Qasym-Jomart Toqaev Túrkııaǵa saparyn qorytyndylady
ASTANA. KAZINFORM — Memleket basshysy Qasym-Jomart Toqaevtyń Túrkııa Respýblıkasyna sapary aıaqtaldy. Bul týraly Aqordanyń baspasóz qyzmeti málim etti.
Memleket basshysyn Ankara áýejaıynan Túrkııa Respýblıkasynyń Saýda mınıstri Omer Bolat jáne basqa da resmı tulǵalar shyǵaryp saldy.
Eske sala keteıik, 28 qazan kúni Prezıdent Qasym-Jomart Toqaev Túrkııaǵa resmı saparmen bardy.
Qasym-Jomart Toqaevty Ankaradaǵy Prezıdent saraıynda saltanatty qarsy alý rásimi ótken bolatyn.
Qos el Memleket basshylary kelissóz júrgizip, Prezıdent qonaqjaılyq tanytqany úshin Túrkııa Prezıdentine alǵys aıtyp, áriptesi men barsha túrik halqyn ulttyq mereke — Respýblıka kúnimen quttyqtady. Óz kezeginde Rejep Taııp Erdoǵan eki el arasyndaǵy san qyrly yntymaqtastyqty odan ári tereńdete túsýge nıetti ekenin rastady.
Memleketter basshylary máńgi dostyq pen keńeıtilgen strategııalyq seriktestik rýhyndaǵy ekijaqty qarym-qatynastyń qarqyndy damyp kele jatqanyn atap ótti.
Al keshe Toqaev Túrki memleketteri uıymynyń 13-sammıtine qatysý úshin «Kýlıe» saraıyna bardy.
Búgin Qasym-Jomart Toqaev Túrki memleketteri uıymynyń 13-sammıtine qatysyp, sóz sóılegen bolatyn.
