Qasym-Jomart Toqaev: Túrkııa — Qazaqstannyń mańyzdy strategııalyq seriktesi
ASTANA.KAZINFORM — Memleket basshysy Túrkııa Prezıdentimen kezdesýdiń qorytyndysy boıynsha baspasóz konferentsııasyn ótkizdi. Bul týraly Aqordanyń baspasóz qyzmeti habarlady.
Qasym-Jomart Toqaev, eń aldymen, Mártebeli Rejep Taııp Erdoǵanǵa shaqyrýyn qabyl alyp, elimizge memlekettik saparmen kelgeni úshin shynaıy rızashylyǵyn bildirdi.
— Atajurtqa taǵy da qosh keldińizder deımin! Sizdiń Qazaqstanǵa at basyn buryp, memlekettik saparmen kelýińiz — biz úshin zor mártebe. Qazaq pen túrik — tamyry bir týysqan halyqtar. Sondyqtan bul sapardyń máni de, mazmuny da aıryqsha. Túrkııa — Qazaqstannyń mańyzdy strategııalyq seriktesi. Eki eldi ǵasyrlar boıy qalyptasqan baýyrlastyq baılanystar, ortaq mádenıet pen rýhanı qundylyqtar biriktiredi. Biz — bir-birimizge shynaıy tileýles eldermiz. Maqsatymyz — bir, baǵyt-baǵdarymyz — aıqyn. Eń basty mindet — halyqtarymyzdyń yntymaǵyn kúsheıtip, tabysyn arttyrý. Búginde Túrkııa — álemde saıası yqpaly zor, ekonomıkasy qýatty, halyqaralyq abyroı-bedeli joǵary memleket. Bul Prezıdent Rejep Taııp Erdoǵannyń arqasy ekenine búkil álem kýá, buǵan eshkimniń kúmáni joq. Taǵy da atap ótý qajet: Túrkııanyń bıik belesterge shyǵyp, zor tabysqa jetýi onyń joǵary basshysynyń kóregen kóshbasshylyǵy men qajyrly eńbeginiń nátıjesi. Sondaı-aq munyń túp-tamyrynda túrik halqynyń danalyǵy, eńbekqorlyǵy, batyldyǵy men birligi jatyr dep sanaımyn, — dedi Qazaqstan Prezıdenti.
Memleket basshysy sońǵy jyldary eki memleket arasyndaǵy san qyrly yqpaldastyq joǵary qarqynmen damyp kele jatqanyna toqtaldy.
— Memleketaralyq, parlamentaralyq jáne úkimetaralyq baılanystarymyz nyǵaıa tústi. Biz búgin Joǵary deńgeıdegi strategııalyq yntymaqtastyq keńesiniń altynshy otyrysyn ótkizdik. Nátıjeli keńes boldy. Ózara seriktestikke serpin beretin basym baǵyttardy aıqyndadyq. Saıası, saýda-ekonomıkalyq jáne mádenı-gýmanıtarlyq baılanystarymyzdy odan ári nyǵaıtýǵa ýaǵdalastyq. Osy maqsatty júzege asyrýǵa quqyqtyq negiz bolatyn mańyzdy úkimetaralyq qujattarǵa qol qoıdyq. Eń bastysy, qazaq-túrik qatynasyn jańa deńgeıge kóteretin «Máńgilik dostyq jáne keńeıtilgen strategııalyq seriktestik týraly» deklaratsııany qabyldadyq. Bul tarıhı qujat, shyn máninde, halyqtarymyzdyń birligi men bolashaqqa degen umtylysynyń biregeı nyshany ekeni anyq, — dedi Qasym-Jomart Toqaev.
