Qasym-Jomart Toqaev To Lamdy І dárejeli «Dostyq» ordenimen marapattady
ASTANA. KAZINFORM — Prezıdent Qazaqstan men Vetnamdy tereńnen tamyr tartatyn dostyq qarym-qatynas baılanystyratyn atap ótti. Bul týraly Aqorda málim etti.
Sonymen qatar 1959 jyly Qazaqstanǵa Vetnamnyń tuńǵysh Prezıdenti Ho Shı Mınniń kelgenin eske saldy. Bul sapar eki eldiń san qyrly yntymaqtastyǵyn damytýdyń berik negizin qalaǵan edi. Qasym-Jomart Toqaev Qazaqstan men Vetnam shynaıy strategııalyq áriptestik ornatqanyn aıtty.
— Sizdiń Qazaqstanǵa memlekettik saparyńyzdyń tarıhı mańyzy zor. Bul qazaq-vetnam qatynasyn damytýdyń mańyzdy kezeńi bastalǵanyn kórsetedi. Búgingi kelissózder qorytyndysy boıynsha ekijaqty yntymaqtastyqty jańa deńgeıge kóteretin strategııalyq seriktestik ornatýǵa kelistik. Bul úshin mol perspektıvaǵa jol ashatyn saıası erik-jiger men saýda-ekonomıkalyq áleýet jetkilikti. Eki el arasyndaǵy dostyqty nyǵaıtýǵa aıryqsha úles qosqanyńyzdy atap ótkim keledi. Osy oraıda Sizge Qazaqstan Respýblıkasynyń memlekettik nagradasy — І dárejeli «Dostyq» ordenin tabystaýǵa ruqsat etińiz. Qazaqstan men Vetnam yqpaldastyǵyn odan ári arttyrýǵa qoldaý kórsete beresiz dep senemin, — dedi Memleket basshysy.
Vetnam Kommýnıstik partııasy Ortalyq komıtetiniń Bas hatshysy Qazaqstannyń eń joǵary memlekettik nagradasyn tapsyrǵany úshin Qasym-Jomart Toqaev pen qazaq halqyna alǵys aıtty.
— Bul — men úshin óte qundy marapat. Óıtkeni muny elderimizdiń ondaǵan jyldardan beri jalǵasyp kele jatqan yntymaqtastyǵy men tilektestiginiń nátıjesi ári qos halyqtyń senimi men shynaıy súıispenshiliginiń belgisi dep bilemin. Qazaqstannyń ósip-órkendeýine, al qazaq halqynyń baq-berekesi arta berýine tilektespin, — dedi Vetnam Kompartııasy OK Bas hatshysy.
Buǵan deıin Vetnam premer-mınıstriniń orynbasary, syrtqy ister mınıstri Býı Than Shon Kazinform agenttigine eksklıýzıv suhbat berip, Qazaqstan-Vetnam qarym-qatynasynyń jaı-kúıi jaıly egjeı-tegjeıli aıtyp bergen edi.
Sondaı-aq, keıingi 30 jyldan astam ýaqytta eki el baılanysy qalaı nyǵaıdy? Kazinform analıtıkalyq sholýshysy osy taqyrypty taldap kórgen bolatyn.
Prezıdent Vetnam Kommýnıstik partııasy Ortalyq komıtetiniń Bas hatshysyn qarsy aldy.