Qasym-Jomart Toqaev TMD-nyń І Volonterler forýmyna qatysýshylarǵa quttyqtaý joldady

Jıynnyń saltanatty ashylý rásiminde QR Premer-mınıstriniń orynbasary — Mádenıet jáne aqparat mınıstri Aıda Balaeva Memleket basshysynyń quttyqtaý sózin oqyp berdi.

— Bul mańyzdy is-shara Qazaqstan usynysymen BUU jarııalaǵan Halyqaralyq volonterler jylynda ótýiniń sımvoldyq máni zor. Bul volonterlerdiń kóptegen áleýmettik, gýmanıtarlyq jáne ekologııalyq máseleni sheshýdegi orasan zor róliniń moıyndalýyn bildiredi, — delingen Prezıdent sózinde.

Sonymen qatar, onyń málimdeýinshe, osy forýmdy ótkizý týraly bastama kótere otyryp, Qazaqstan TMD aıasynda tájirıbe almasýǵa jáne halyqaralyq arenadaǵy volonterlik bastamalardy biriktirýge arnalǵan turaqty alań qurýdy maqsat etti. Qazaqstan úshin dostyq kópirlerin qalyptastyrý, yntymaqtastyq, meıirimdilik jáne janashyrlyq sııaqty qundylyqtardy ornyqtyrý asa mańyzdy.

Odan bólek, Qazaqstanda volonterlik adam áleýetin damytýǵa, azamattyq ıdeıalardy ilgeriletýge jáne jańa qoǵamdyq etıkany qalyptastyrýǵa qyzmet etedi.

— 1 shildeden bastap jańa Konstıtýtsııa kúshine endi. Ol elimizdiń tarıhynda alǵash ret volonterlik qyzmetke memlekettik qoldaýdy eń joǵary quqyqtyq deńgeıde bekitti. Eriktilerdiń izgi nıeti — sarqylmas shabyt kózi ári qoǵamdy ózgertýdiń qýatty kúshi. Buǵan «Taza Qazaqstan» jalpyulttyq qozǵalysy jarqyn mysal bola alady. Bul ıgi bastama qysqa merzim ishinde kóptegen azamatty, ásirese belsendi jastardy biriktirdi. Jalpy, Volonterler jyly aıasynda myńdaǵan is-shara ótkizildi. Qazir elimizdegi volonterler sany 300 myńǵa jýyqtady. Bul forým memleketterimiz arasyndaǵy gýmanıtarlyq yntymaqtastyqty damytýǵa eleýli úles qosyp, halyqtar arasyndaǵy baılanystardy, ózara senim men tatý kórshilikti nyǵaıtýǵa yqpal etedi dep senemin. Basty maqsat — TMD aýmaǵyn jasampazdyq pen progress, birlik pen ózara túsinistik keńistigine aınaldyrý. Barlyq volonterge álemdi jaqsy jaqqa ózgertýge degen umtylystary úshin shynaıy alǵysymdy bildiremin. Forým qatysýshylaryna jemisti jumys jáne úlken ortaq jetistikter tileımin! — delingen Memleket basshysynyń quttyqtaýynda.

Aıta keteıik, eki kúnge josparlanǵan forýmǵa Qazaqstan, Ázerbaıjan, Belarýs, Qyrǵyzstan, Reseı, Tájikstan jáne Ózbekstannan memlekettik organdardyń, volonterlik uıymdardyń ókilderi men eriktilerdi qosa alǵanda, shamamen 300 delegat qatysyp jatyr.

Forým aıasynda paneldik sessııalar, taqyryptyq pikirtalastar jáne volonterlik qyzmettiń tabysty tájirıbeleriniń tanystyrylymy ótedi. Ekologııa, áleýmettik jáne ınklıýzıvti qoldaý, sondaı-aq jastar volonterligin damytý salalaryndaǵy memleketaralyq yntymaqtastyqty nyǵaıtýǵa, birlesken bastamalardy qalyptastyrýǵa erekshe nazar aýdarylady.

Sonymen qatar, endi is-shara uıym elderi arasyndaǵy volonterlik bastamalardy biriktirýge jáne tájirıbe almasýǵa arnalǵan alań retinde jyl saıyn uıymdastyrylady.

Aıta keteıik, buǵan deıin elde volonterlik qozǵalysty 2030 jylǵa deıin damytý jospary qaralǵanyn jazǵanbyz.