Qasym-Jomart Toqaev TMD elderin tótenshe jaǵdaılardy boljaý ortalyǵyn qurýǵa shaqyrdy
DÝShANBE. KAZINFORM — Prezıdent klımattyq jáne tehnogendik tótenshe jaǵdaılardy boljaýdyń óńirlik ortalyǵyn qurý arqyly birlese jumys isteýdi usyndy, dep habarlaıdy Aqordanyń baspasóz qyzmeti.
Qasym-Jomart Toqaev tsıfrlandyrý men jasandy ıntellekt memleketterdiń ornyqty damýy men básekege qabilettiliginiń negizgi faktoryna aınalǵanyna mán berdi. Qazaqstan memlekettik basqarý, áleýmettik sala men azamattardyń turmys-tirshiligin qamtıtyn tsıfrlyq kún tártibin jedel ilgeriletip keledi. Jasandy ıntellekt jáne tsıfrlyq damý mınıstrligi quryldy, Tsıfrlyq kodeks boıynsha jumys júrgizilip jatyr. Sondaı-aq atalǵan saladaǵy barlyq bastama men jobany ulttyq strategııaǵa biriktiretin Tsıfrlyq Qazaqstan tujyrymdamalyq qujaty ázirlenýde. Prezıdent elimiz TMD memleketterimen osy saladaǵy yntymaqtastyqqa ashyq ekenin málimdedi. Memleket basshysy jýyrda elimizde jasandy ıntellekt salasyna mamandanǵan ýnıversıtet qurý jóninde sheshim qabyldanǵanyna toqtaldy. Budan bólek, 400 myń stýdentti qamtyp, zertteýshiler komandasy men DeepTech startaptarynyń qalyptasýyna qolaıly jaǵdaı jasaıtyn memlekettik baǵdarlama tabysty júzege asyryldy. Qasym-Jomart Toqaev osy jobany keńinen taratýdy usynyp, jahandyq naryqtaǵy qatań báseke jaǵdaıynda jumys isteýge qabiletti mamandardyń jańa býynyn daıarlaý maqsatynda Qazaqstannyń Dostastyq elderimen yntymaqtastyq ornatýǵa ázir ekenin jetkizdi. Memleket basshysy ekologııalyq qaýip, tabıǵı jáne tehnogendik apattar TMD elderiniń ornyqty damýyna zor qater tóndiredi dep sanaıdy. Prezıdenttiń aıtýynsha, mundaı jaǵdaılardy erte bastan anyqtaýdyń jáne eskertýdiń tıimdi tetikterin qarastyrý mańyzdy mindet.
— Klımattyq jáne tehnogendik tótenshe jaǵdaılardy boljaýdyń óńirlik ortalyǵyn qurý arqyly birlese jumys isteýdi usynamyz. Kaspıı teńiziniń tez tartylyp bara jatqany zor alańdaýshylyq týǵyzyp otyr. Negizi, bul — óńirlik qana emes, jahandyq problema. Sondyqtan bizdiń bastamamyzben ázirlenip jatqan Kaspııdiń sý resýrstaryn saqtaý boıynsha memleketaralyq baǵdarlamaǵa qosylýdy usynamyz. Mundaı mańyzdy qujatty daıyndaýǵa Kaspıı teńiziniń jaǵalaýyndaǵy eldermen birge barlyq múddeli memleketter jáne halyqaralyq uıymdar tartylýǵa tıis, — dedi Prezıdent.
Budan buryn 2026 jyly Qazaqstan Eýrazııalyq ekonomıkalyq odaq organyna tóraǵalyq etetini habarlandy.