Qasym-Jomart Toqaev Tájikstan Prezıdenti Emomalı Rahmonmen telefon arqyly sóılesti

ASTANA. KAZINFORM — Memleketter basshylary birin-biri barsha musylman qaýymy úshin qasıetti Oraza aıt meıramymen quttyqtap, Qazaqstan men Tájikstan halqyna baq-bereke tiledi.

Tájikstan Prezıdenti elimizdiń birqatar óńirinde bolǵan sý tasqynyna baılanysty qoldaý bildirip, qajetti kómek kórsetýge daıyn ekenin málimdedi.

Óz kezeginde Memleket basshysy tileýlestik tanytqany úshin Tájikstan Prezıdentine alǵys aıtyp, qazirgi tańda sý tasqynymen kúres jumystary tolyqtaı baqylaýda ekenin, Úkimet apat saldaryn joıý úshin barlyq qajetti sharany qabyldap jatqanyn aıtty.

Taraptar Qazaqstan men Tájikstan arasyndaǵy strategııalyq seriktestiktiń qazirgi jaı-kúıi men ony odan ári nyǵaıtý perspektıvasyn talqylady. Eki eldiń úkimetterine saıası, saýda-ekonomıkalyq jáne mádenı-gýmanıtarlyq salalarda qol jetkizilgen ýaǵdalastyqtardy sapaly júzege asyrý tapsyryldy.

Memleketter basshylary qazirgi halyqaralyq jáne aımaqtyq kún tártibindegi ózekti máseleler jóninde pikir almasyp, aldaǵy kezdesýler kestesin qarastyrdy.