Qasym-Jomart Toqaev Táýelsizdik saraıynda Túrkııa Prezıdentin qarsy aldy
ASTANA. KAZINFORM – Memleket basshysy Qasym-Jomart Toqaevtyń elimizge memlekettik saparmen kelgen Túrkııa Prezıdenti Rejep Taııp Erdoǵandy Táýelsizdik saraıynda resmı qarsy alý rásimi ótti.
Táýelsizdik saraıynyń aldyna kelip toqtaǵan kólikten túsken mártebeli meımandy Qasym-Jomart Toqaev qarsy aldy. Osydan keıin áýede joıǵysh ushaqtar Túrkııanyń memlekettik týyn boıaýmen beıneledi. Saraıǵa kirgen Prezıdentter bir-birine resmı delegatsııa múshelerin tanystyrdy.
Osydan keıin mártebeli meımannyń saparyna oraı sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Túrkııa Prezıdenti kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń Memleket basshylary qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta Memleket basshylary ekijaqty qarym-qatynastyń qazirgi jaǵdaıy men bolashaǵyn talqylaýǵa ótti. Sonymen qatar búgin Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń altynshy otyrysy josparlanǵan.
Esterińizge sala ketsek, keshe Qasym-Jomart Toqaev Astana áýejaıynda Túrkııa Prezıdenti Rejep Taııp Erdoǵandy qarsy aldy.
Elimizdiń shekarasyna engen sátten Astana áýejaıyna deıin Túrkııa Prezıdentiniń bortyna Qazaqstan Respýblıkasy Áýe qorǵanysy kúshteriniń ushaqtary qaptaldasa ushty. Túrkııa Prezıdentiniń kelýine oraı trap aldynda Qurmet qaraýyly rotasy sap túzedi. Eki eldiń jalaýshalaryn ustaǵan balalar Rejep Taııp Erdoǵan bastaǵan Túrkııa eliniń resmı delegatsııasyna «Ata yurda hoş geldiniz!» — «Atajurtqa qosh keldińiz!» dep eki tilde qoshemet kórsetti. Sol sátte Túrkııa men Qazaqstan týlaryn jelbiretken tikushaqtar alań ústimen ushyp ótti.
