Qasym-Jomart Toqaev Táýelsizdik saraıynda Reseı Prezıdentin qarsy aldy
ASTANA. KAZINFORM — Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
Elordadaǵy Táýelsizdik saraıyna kelgen mártebeli meımandy Qasym-Jomart Toqaev qarsy aldy.
Osydan keıin áýede joıǵysh ushaqtar Reseıdiń memlekettik týyn boıaýmen beıneledi. Saraıǵa kirgen Prezıdentter bir-birine resmı delegatsııa múshelerin tanystyrdy.
Budan keıin kórshi el prezıdentiniń memlekettik saparyna oraı sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Reseı Prezıdenti kilemshe boıymen Qazaqstan Respýblıkasynyń Memlekettik Týyna qaraı júrdi. Onyń aldyna kelgende meıman toqtap, basyn sál ıip, óziniń qurmetin bildirdi.
Atap aıtqanda, buǵan deıin 27-29 mamyr kúnderi Prezıdent Qasym-Jomart Toqaevtyń shaqyrýymen Qazaqstanǵa Reseı Federatsııasynyń Prezıdenti Vladımır Pýtın memlekettik saparmen keletinin jazǵan edik.
Memleketter basshylary kelissózder barysynda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Keshe Astana áýejaıynda Vladımır Pýtındi Memleket basshysy Qasym-Jomart Toqaev qarsy aldy.
Kazinform tilshisi Astana men Máskeý arasyndaǵy yntymaqtastyqtyń qazirgi damý úrdisteri men aldaǵy perspektıvasyn sholyp shyqqan bolatyn.
