Qasym-Jomart Toqaev Táýelsizdik saraıynda Oman Sultanyn qarsy aldy
ASTANA. KAZINFORM – Elordada Prezıdent Qasym-Jomart Toqaevtyń Qazaqstanǵa memlekettik saparmen kelgen Oman Sultany Haısam ben Tarıq Ál Saıdty qarsy alý rásimi ótti.
Táýelsizdik saraıyna kelgen mártebeli meımandy Qasym-Jomart Toqaev qarsy aldy. Memleket basshylary bir-birine resmı delegatsııa múshelerin tanystyrdy.
Osydan keıin mártebeli meımannyń saparyna oraı sap túzegen Qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Oman Sultany kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń Memleket basshylary Qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Táýelsizdik saraıynda bastalǵan joǵary deńgeıde ótetin kelissózder barysynda taraptar saıası dıalogty nyǵaıtý, sondaı-aq saýda-ekonomıkalyq, ınvestıtsııalyq jáne mádenı-gýmanıtarlyq yntymaqtastyqty keńeıtý perspektıvasyn talqylaıdy dep josparlanyp otyr.
Buǵan deıin Memleket basshysy Oman Sultanyn elorda áýejaıynda qarsy alǵanyn jazǵan edik. Áýejaı zalynda eki el basshylary az-kem áńgimelesti.
— Oman Sultandyǵy ekonomıkasyn ilgeriletýde zor tabysqa jetken, halyqaralyq arenada óte belsendi ári konstrýktıvti dáneker memleket retinde belgili. Elińizdiń óz aımaǵynda, odan tysqary jerlerde, sonyń ishinde Qazaqstanda da bedeli bıik. Memleketterimiz arasyndaǵy seriktestiktiń áleýeti zor ekenine senimdimin. Aldymyzda yntymaqtastyq aıasyn meılinshe keńeıtý mindeti tur, — degen edi Prezıdent.
