Qasym-Jomart Toqaev Táýelsizdik saraıynda Kenııa Prezıdentin qarsy aldy
ASTANA. KAZINFORM — Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótti.
Táýelsizdik saraıyna kelgen mártebeli meımandy Qasym-Jomart Toqaev qarsy aldy. Prezıdentter bir-birine resmı delegatsııa múshelerin tanystyrdy.
Osydan keıin mártebeli meımannyń saparyna oraı sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Kenııa Prezıdenti kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń Memleket basshylary qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Joǵary deńgeıdegi kelissózder barysynda eki eldiń saýda-ekonomıkalyq jáne mádenı-gýmanıtarlyq yntymaqtastyǵyn damytý perspektıvasy talqylanady. Sonymen qatar birqatar qujatqa qol qoıylady dep josparlanyp otyr.
Aıta keteıik, keshe elimizge memlekettik saparmen kelgen Ýılıam Samoeı Rýtony Syrtqy ister mınıstri Ermek Kósherbaev Astana áýejaıynda qarsy aldy.
