Qasym-Jomart Toqaev Taıland Premer-mınıstrin Qazaqstanǵa shaqyrdy
ASTANA.KAZINFORM — Memleket basshysy Taıland Premer-mınıstriniń orynbasary – Syrtqy ister mınıstri Sıhasak Pýangketkeomen kezdesti. Bul týraly Aqordanyń baspasóz qyzmeti habarlady.
Mártebeli meımanǵa iltıpat bildire otyryp, Memleket basshysy onyń elimizge sapary Qazaqstan men Taıland arasyndaǵy qarym-qatynastyń damýyna tyń serpin berý turǵysynan mańyzdy ekenin atap ótti.
– Sizdiń elińiz Ońtústik-Shyǵys Azııadaǵy jetekshi ekonomıkalardyń biri, Jahandyq Ońtústiktiń mańyzdy ókili ári halyqaralyq qoǵamdastyqtyń bedeldi múshesi sanalady. Qazaqstan Taılandpen ózara tıimdi yntymaqtastyqty tereńdetýge múddeli. Kelesi jyly elderimiz arasynda dıplomatııalyq qatynas ornaǵanyna 35 jyl tolýyn atap ótemiz, – dedi Qasym-Jomart Toqaev.
Memleket basshysy ekijaqty saýda-ekonomıkalyq baılanystar qarqyny údep kele jatqanyna nazar aýdardy. Buǵan ózara vızasyz rejım, týrıster aǵynynyń joǵary kórsetkishi jáne iskerlik baılanystardyń keńeıýi aıtarlyqtaı septigin tıgizip otyr.
– Qazaqstan – Taılandtyń Ortalyq Azııadaǵy eń iri saýda seriktesi. Óńirmen jalpy taýar aınalymynyń 70 paıyzy bizdiń elimizge tıesili. Áıtse de áleýetimiz áli jetkilikti dep sanaımyz. Qazirgi kezde Qazaqstan naryǵynda 55 taılandtyq kompanııa tirkelgen. Sizben birge elimizge úlken bıznes-delegatsııa kelgen eken. Qazaqstan iskerlik baılanystardyń nyǵaıýyn quptaıdy ári Taıland kompanııalaryn elimizdegi ınvestıtsııalyq múmkindikterdi qarastyrýǵa shaqyrady, – dedi Prezıdent.
Sıhasak Pýangketkeo qonaqjaılyq tanytqany úshin Prezıdent Qasym-Jomart Toqaevqa alǵys aıtyp, Taıland Úkimeti Qazaqstanmen san qyrly yntymaqtastyqty odan ári nyǵaıtýǵa nıetti ekenin jetkizdi.
– Elińizdiń ekonomıkalyq jetistikterine shynaıy tántimiz. Búginde Qazaqstannyń orta derjava retinde álemdik arenadaǵy róli artyp keledi ári Taılandtyń Ortalyq Azııadaǵy basty seriktesi sanalady. Bizdiń elimiz Ońtústik-Shyǵys Azııa memleketteri qaýymdastyǵymen (ASEAN) yqpaldastyqty damytýda dáneker bolýǵa daıyn. Bul rette biz tıimdi ári ózara paıdaly yntymaqtastyqty jolǵa qoıýdy usynamyz. Taıland týrızm, onyń ishinde medıtsına týrızmi, qonaq úıler qurylysy, asa mańyzdy mıneraldardy jetkizý tizbegin damytý jáne azyq-túlik qaýipsizdigin qamtamasyz etý baǵyttarynda birlesken jobalardy júzege asyrýǵa múddeli, – dedi Premer-mınıstrdiń orynbasary.
Budan bólek, Sıhasak Pýangketkeo Taıland Qazaqstannyń birqatar bastamasyn qoldaǵanyn jetkizdi. Olardyń qatarynda BUU ESKATO turaqty damý maqsattary úshin Azııa-Tynyq muhıty tsıfrlyq sheshimder ortalyǵyn ashý jáne BUU qurylymy aıasynda Halyqaralyq sý uıymyn qurý týraly bastamalar bar.
Qasym-Jomart Toqaev Taılandtyń AÓSShK qyzmetin damytýǵa qosqan eleýli úlesin atap ótip, halyqaralyq qurylymdar aıasyndaǵy nátıjeli yntymaqtastyq úshin rızashylyǵyn bildirdi.
Kezdesý sońynda Memleket basshysy Taıland Premer-mınıstri Anýtın Charnvırakýldi Qazaqstanǵa resmı saparmen kelýge shaqyryp, izgi sálemin joldady.
