Qasym-Jomart Toqaev sýperkompıýterdi iske qosý rásimine qatysty
ASTANA. KAZINFORM - Memleket basshysy Alemcloud Ulttyq sýperkompıýter ortalyǵyna baryp, NVIDIA H200 grafıkalyq protsessorlary bazasynda jasaqtalǵan sýperkompıýterdi iske qosý rásimine qatysty, dep habarlaıdy Aqordanyń baspasóz qyzmeti.
Jańa data-ortalyqtaǵy júıeni Tsıfrlyq damý, ınnovatsııalar jáne aeroǵarysh ónerkásibi mınıstrligi halyqaralyq seriktestermen birge ornatyp, paıdalanýǵa berdi.
Jańa sýperkompıýter klasteri FP8 formatynda esepteý ádistemesi boıynsha 2 ekzaflopsqa deıingi ónimdilikti qamtamasyz ete alady. Esepteý qýaty jaǵynan Ortalyq Azııa óńirindegi eń úzdigi sanalady.
Qasym-Jomart Toqaev sýperkompıýterdiń iske qosylýy elimizdegi negizgi salalardy tsıfrlandyratyn mańyzdy qadam ekenin atap ótti. Bul Qazaqstannyń tsıfrlyq tehnologııalardy damytýda aıtarlyqtaı órkendeýine yqpal etedi.
Sýperkompıýterdiń esepteý qýatyn neırojeli sheshimderin ázirleýmen aınalysatyn startaptar, ýnıversıtetter men ǵylymı ortalyqtar, sondaı-aq memlekettik mekemeler men jeke kompanııalar paıdalana alady.
Eske salsaq, ótken jyly Qazaqstan qýaty kúshti sýperkompıýter qurýǵa kirisken bolatyn.
Tsıfrlyq damý, ınnovatsııalar jáne aeroǵarysh ónerkásibi mınıstrligi sýperkompıýterge qajet jabdyqtardy jetkizý protsesine túsinik bergen edi.