Qasym-Jomart Toqaev SpaceX kompanııasynyń vıtse-prezıdentimen kezdesti

Memleket basshysy Qasym-Jomart Toqaev SpaceX kompanııasynyń Starlink máseleleri jónindegi vıtse-prezıdenti Loren Dreıermen kezdesti. Kazinform bul týraly Aqordaǵa silteme jasap habarlaıdy.

QR Prezıdenti Loren Dreıermen kezdesýde SpaceX ǵarysh telekommýnıkatsııasy salasyndaǵy álemdik kóshbasshy kompanııalardyń biri ekenin atap ótti.

Q.Toqaevtyń aıtýynsha, SpaceX kompanııasynyń ázirlemeleri joǵary tehnologııalardyń damýyn yntalandyrý úshin suranysqa ıe strategııalyq quralǵa aınaldy. Qazaqstan SpaceX korporatsııasyn ózara tıimdi yntymaqtastyq ornatý úshin senimdi seriktes retinde qarastyrady.

Óz kezeginde Loren Dreıer StarLink kompanııasynyń Qazaqstandaǵy qyzmetin keńeıtý jónindegi jospary, atap aıtqanda, elimizdiń shalǵaı aýyldaryn spýtnıktik ınternetpen qamtamasyz etý jobasy týraly aıtty.