Qasym-Jomart Toqaev sot júıesinde aýqymdy kadrlyq ózgerister jasady
ASTANA. KAZINFORM - Memleket basshysy Qasym-Jomart Toqaev Qazaqstannyń sot júıesindegi aýqymdy kadrlyq ózgerister týraly Jarlyqqa qol qoıdy.
Qujat sot tóraǵalary, túrli deńgeıdegi sýdıalar men respýblıka boıynsha sot organdary jetekshilerin taǵaıyndaý, ózgertý jáne laýazymynan bosatý máselelerin qarastyrady.
Jarlyq aıasynda kadrlardy aýqymdy rotatsııalaý júrgizildi. Respýblıkalyq mańyzy bar qalalardaǵy, oblystyq jáne aýdandyq deńgeıdegi sottarǵa, sondaı-aq mamandandyrylǵan ákimshilik, ekonomıkalyq jáne tergeý sottaryna jańa tóraǵalar men sýdıalar taǵaıyndaldy.
Olardy myna siltemeden kórýge bolady.
Laýazymnan bosatý
Sonymen qatar birqatar sýdıa túrli negizder boıynsha qyzmetinen bosatyldy. Olardyń qatarynda zeınetkerlikke shyqqandar, jasyna baılanysty ókilettigi toqtatylǵandar, óz ótinishimen qyzmetten ketkender, sondaı-aq Sýdıalar jıýrıi men tártiptik organdardyń sheshimi negizinde laýazymynan bosatylǵandar bar.
Tártiptik blok
Jarlyqta tártiptik sıpattaǵy sheshim de qamtylǵan. Atap aıtqanda, sýdıa Moldabek Ahmetovtiń qyzmeti sot bıliginiń bedeline nuqsan keltiretin teris qylyq jasaǵany úshin toqtatyldy.
Jarlyq qol qoıylǵan kúnnen bastap kúshine endi.
Aıta keteıik, jaqynda Prezıdent orta bilim berý júıesine jasandy ıntellektini engizý týraly Jarlyqqa qol qoıdy.
