Prezıdent Slovenııamen qandaı salalarda tyń jobalarlar júzege asyrylatyndyǵyn atady

ASTANA. KAZINFORM – Qazaqstan-Slovenııa úkimetaralyq komıssııanyń qyzmeti jańa deńgeıge kóterilmek. Bul týraly Aqordada elimizge resmı saparmen kelgen Slovenııa Prezıdenti Natasha Pırts-Mýsarmen kelissózderden keıingi BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev atty.

- Slovenııa – Qazaqstannyń Eýropa odaǵyndaǵy senimdi, mańyzdy seriktesi. Eki eldiń qarym-qatynasy dostyq jáne ózara syılastyq rýhynda nyǵaıyp kele jatyr. Byltyr Slovenııa astanasy – Lıýblıana qalasynda Qazaqstan Elshiliginiń ashylýy sonyń aıqyn dáleli. Men muny yqpaldastyǵymyzdy damytý jolyndaǵy mańyzdy qadam dep sanaımyn. Qazaqstan eki el arasyndaǵy dostyqty odan ary tereńdetýge múddeli. Sondyqtan bul sapardyń mán-mańyzy aıryqsha, - dedi Memleket basshysy.

Qasym-Jomart Toqaev Prezıdent Pırts-Mýsar hanymmen mazmundy ári jemisti kelissóz júrgizgendigin basa aıtty.

- Qazaq-sloven yntymaqtastyǵynyń aıasyn keńeıtý jolyn talqyladyq. Naqty kelisimderge qol jetkizdik. Birlesken málimdemeni qabyldadyq. Sondaı-aq búgin birqatar úkimetaralyq jáne mekemearalyq kelisim jasaldy. Sonyń ishinde densaýlyq saqtaý, týrızm, bilim berý salasyna qatysty mańyzdy qujattar bar. Bul kelisimderdi tıimdi iske asyrý arqyly eki eldiń yntymaqtastyǵyn jandandyra túsemiz dep senemin, - dedi Prezıdent.

Memleket basshysy ekijaqty qatynastyń ózegi - saýda-ekonomıkalyq jáne ınvestıtsııalyq baılanystardy arttyrýǵa keliskendikterin atap ótti.

- Qazir biz farmatsevtıka, jańartylatyn energııa, ınjenerııa, telekommýnıkatsııa salasynda mańyzdy jobalalardy júzege asyryp jatyrmyz. Elimizde osy salalarda 20-ǵa jýyq sloven kompanııasy tabysty jumys isteýde. Ekonomıkalyq baılanystardyń aýqymyn odan ary keńeıtý mańyzdy. Osy oraıda tsıfrlandyrý jáne ınnovatsııa, jasyl energetıka, atom ónerkásibi, densaýlyq saqtaý, týrızm salasynda tyń jobalardy júzege asyrýǵa kelistik. Qolda bar múmkindikti tıimdi paıdalaný úshin úkimetaralyq komıssııanyń jumysyn jandandyryp, onyń qyzmetin jańa deńgeıge kóterýge shaqyrdym, - dedi Qasym-Jomart Toqaev.

Buǵan deıin Memleket basshysyQazaqstan-Slovenııa bıznes keńesin qurýdy usynǵan edi.