Qasym-Jomart Toqaev Shoqan Ýálıhanov atyndaǵy áskerı kolledjge bardy
ASTANA. KAZINFORM — Memleket basshysy Qazaqstan Respýblıkasy Qorǵanys mınıstrligine qarasty Shoqan Ýálıhanov atyndaǵy áskerı kolledjdiń qyzmetimen tanysty. Bul týraly Aqordanyń baspasóz qyzmeti habarlady.
Prezıdentke halyqaralyq áskerı-patrıottyq jıynǵa qatysýshylardyń Dubai SWAT Challenge kedergiler jolaǵynyń balamasy retinde jasalǵan «Aıbyn» kedergiler jolaǵymen júrip ótken sáti jáne atys daıyndyǵyn pysyqtaıtyn Action Air daıyndyq alańy kórsetildi.
Sonymen qatar jastarǵa patrıottyq tárbıe berýdiń Aibyn App tsıfrlyq platformasy men kolledj kitaphanasy tanystyryldy.
Budan bólek, Memleket basshysy oqý-zerthana keshenin aralap kórdi. Munda kadetter elimizde qurastyrylǵan sımýlıatsııalyq qondyrǵylarda jattyǵady.
Qasym-Jomart Toqaevqa otandyq «Arlan» brondalǵan kóligi jáne ushqyshsyz avıatsııa tehnologııalary sekildi zamanaýı áskerı tehnıkalardyń úlgileri kórsetildi.
Prezıdent áskerı kolledj bastyǵy Aıbek Ǵabdrahovqa avtobýs kiltin tapsyrdy.
Qorǵanys mınıstrliginiń kadet korpýsy Prezıdenttiń 1996 jylǵy 1 shildedegi Jarlyǵymen qurylǵan. 2000 jyly oqý ornyna qazaq ǵalymy jáne ofıtseri Shoqan Ýálıhanovtyń esimi berildi. 2020 jyly Kadet korpýsynyń ataýy Shoqan Ýálıhanov atyndaǵy áskerı kolledj bolyp aýysty
