Qasym-Jomart Toqaev Іshki ister mınıstrine qoǵamdyq qaýipsizdikti odan ári arttyrýdy tapsyrdy

ASTANA. KAZINFORM — Memleket basshysy Іshki ister mınıstri Erjan Sádenovti qabyldady. Qasym-Jomart Toqaevqa elimizdegi qylmystyq ahýal men ishki ister organdary júzege asyryp jatqan Zań men tártip qaǵıdatynyń oryndalýy týraly baıandaldy.

Prezıdent quqyq qorǵaý organdarynyń keńeıtilgen alqa otyrysynda bergen tapsyrmalarynyń oryndalý barysymen tanysty.

Erjan Sádenov bıylǵy 7 aıda qabyldanǵan keshendi sharalardyń nátıjesinde eldegi qylmys sany 9 myńǵa azaıǵanyn málimdedi. 

Adam óltirý, qaraqshylyq, densaýlyqqa aýyr zııan keltirý, buzaqylyq jáne taǵy basqa negizgi qylmys túrleriniń tómendeýi baıqalady. Bul isterdi ashý deńgeıi jaqsaryp keledi.

Aýyr jáne asa aýyr qylmysqa qatysy bar 146 qylmystyq top joıyldy.

Polıtsııa óndirisindegi barlyq qylmystyq is boıynsha azamattardyń 28 mıllıard teńgeden astam shyǵyny óteldi.

Іshki ister mınıstri qylmyskerlerdi izdestirý jumystarynyń nátıjesi týraly da baıandady. 

Esepti kezeńde izdeýde júrgen 956 adam ustaldy, olardyń 24-i shetelden Qazaqstanǵa ekstradıtsııalandy. Habar-osharsyz ketken 600 adamnyń, sonyń ishinde 125 kámeletke tolmaǵannyń júrgen jeri anyqtaldy.

Internet-alaıaqtyqqa qarsy is-qımyl aıasynda 6 call-ortalyq joıyldy, 67 mıllıon jalǵan qońyraý men 3 myńnan astam alaıaqtyq saıt buǵattaldy. Alaıaqtardyń 2,8 mıllıard teńgeni shyǵarýyna jol berilmedi.

11 tonnadan astam esirtkiniń aınalymǵa túsýine tosqaýyl qoıylyp, 19,5 myń esirtki saıty buǵattaldy.

Mas kúıde jasalatyn qylmystyń aldyn alý, kadrlyq áleýetti arttyrý jáne qylmystyq-atqarý júıesin jetildirý sharalaryna toqtaldy.

Qasym-Jomart Toqaev elimizdegi quqyqtyq tártip pen qoǵamdyq qaýipsizdikti odan ári arttyrýǵa qatysty birqatar mindet júktedi.

Aıta keteıik, buǵan deıin Prezıdent Qazaqstan ınvestorlar qaýymdastyǵynyń tóraǵasy Bolat Aqsholaqovty qabyldady.