Qasym-Jomart Toqaev Іshki ister mınıstri Erjan Sádenovti qabyldady
Memleket basshysy Іshki ister mınıstri Erjan Sádenovti qabyldady, dep habarlaıdy Kazinform Aqordaǵa silteme jasap.
Qasym-Jomart Toqaevqa elimiz boıynsha kisi óltirý, buzaqylyq, urlyq, qaraqshylyq, tonaý jáne mal urlyǵyna qatysty qylmystar sanynyń aıtarlyqtaı tómendeýine yqpal etken aldyn alý sharalary týraly málimet berildi.
Kóshelerde qaýipsizdik deńgeıiniń artqany atalyp ótti.
Prezıdentke quqyq buzýshylyqtarǵa «múlde tózbeýshilik» jáne jazanyń bultartpastyǵy, kámeletke tolmaǵandardyń quqyǵyn qorǵaý jáne ınternet-alaıaqtyqqa qarsy is-qımyl boıynsha júrgizilip jatqan jumystar jóninde baıandaldy.
Erjan Sádenovtiń aıtýynsha, jyl basynan beri aýyspaly nómirlerden shalynǵan 37 mıllıon qońyraý buǵattalyp, zańǵa qaıshy kontenti bar 16 myń saıt anyqtalǵan.
Memleket basshysyna Nashaqorlyqqa jáne esirtki bıznesine qarsy kúres jónindegi 2023-2025 jyldarǵa arnalǵan keshendi jospardyń iske asyrylýy týraly aqparat berildi.
Mınıstrdiń aıtýynsha, 31 tonnadan astam esirtki jáne 79 tonna prekýrsor tárkilenip, 39 esirtki zerthanasyn joıylǵan.
Sonymen qatar Prezıdentke qylmystyq-atqarý júıesi men Ulttyq ulan qyzmetiniń qazirgi jaı-kúıi týraly aıtyldy.
Kezdesý sońynda Qasym-Jomart Toqaev elimizdegi quqyqtyq tártip pen qoǵamdyq qaýipsizdik deńgeıin odan ári arttyrýǵa baǵyttalǵan birqatar tapsyrma berdi.
