Qasym-Jomart Toqaev «ShYU plıýs» sammıtine qatysty
ASTANA. KAZINFORM - Shanhaı yntymaqtastyq uıymyna múshe memleketter basshylary keńesiniń otyrysy «ShYU plıýs» formatynda jalǵasty, dep habarlaıdy Aqordanyń baspasóz qyzmeti.
Prezıdent sammıtte sóz sóılep, Qyrǵyzstannyń ShYU-ǵa tóraǵalyǵy joǵary deńgeıde ótip jatqanyn aıtty.
– Qyrǵyzstan Uıym múshelerin jumyldyryp, bizdiń usynystarymyzdan «Turaqty beıbitshilik, damý jáne órkendeý jolyndaǵy birlik» urany aıasynda mazmundy kún tártibin qalyptastyrdy. Bishkek sammıtiniń qorytyndysy ortaq maqsattarǵa bir taban jaqyndatyp, Eýrazııa keńistigindegi turaqtylyqty saqtaıtyn basty tirekterdiń biri retinde Shanhaı yntymaqtastyq uıymyn nyǵaıta túsetinine senimdimin, – dedi Memleket basshysy.
Qasym-Jomart Toqaev ortaq strategııalyq mindetke toqtaldy. Onyń paıymdaýynsha, kúsh kórsetý kýlti men konfrontatsııa ornyna ózara jaýapkershilik, birlese damý jáne uzaqmerzimdi yntymaqtastyq saltanat quratyn jańa álemdik tártip qalyptasýǵa tıis.
– Halyqaralyq arenadaǵy mundaı yqpaldastyqtyń eń úlgili modeli «Shanhaı rýhy» ekenin ShYU-nyń kópjyldyq tájirıbesi anyq kórsetedi. Uıym qyzmetindegi teńdik pen konsensýs qaǵıdattary, shyn máninde, kópjaqty yntymaqtastyqty tabysty damytýdyń úzdik ólshemine aınaldy. Sondyqtan ShYU-nyń basty qaǵıdattaryn Halyqaralyq kópjaqty yntymaqtastyq jáne beıbitshilik jolyndaǵy dıplomatııa kúnine arnalǵan BUU Bas Assambleıasynyń arnaıy qararynda bekitýdi usynamyn, – dedi Prezıdent.
Osyǵan deıin ShYU-ǵa múshe memleketter basshylary keńesiniń otyrysynda birqatar qujatqa qol qoıylǵany týraly jazdyq.
