Qasym-Jomart Toqaev Sheteldik ınvestorlar keńesiniń jańa múshelerin tanystyrdy
ASTANA. KAZINFORM — Elordada QR Prezıdenti janyndaǵy Sheteldik ınvestorlar keńesiniń 38-otyrysy bastaldy. Memleket basshysy Qasym-Jomart Toqaev Sheteldik ınvestorlar keńesiniń jańa múshelerin tanystyrdy.
Prezıdenttiń aıtýynsha, Sheteldik ınvestorlar keńesi otyz jylǵa jýyq ýaqyt boıy Qazaqstanda qolaıly ınvestıtsııalyq ahýaldy qalyptastyrýda mańyzdy ról atqaryp keledi.
— Keńes músheleriniń belsendi qatysýynyń arqasynda biz ınvestıtsııalyq ahýaldy jaqsartýǵa, ashyqtyqty arttyrýǵa jáne Qazaqstanda bıznes júrgizý sharttaryn jeńildetýge baǵyttalǵan keshendi reformalardy jalǵastyra bermekpiz. Bul — eshbir jaǵdaıda ózgermeıtin negizgi ustanymymyz, — dep atap ótti Qasym-Jomart Toqaev elordada Táýelsizdik saraıynda.
Soynmen birge, Prezıdent Sheteldik ınvestorlar keńesiniń jańa múshelerine sáttilik tiledi. Atap aıtqanda, Afrıka, Taıaý Shyǵys jáne Ortalyq Azııa boıynsha Martan Vojýr ókildik etetin Alstom kompanııasy úsh jyl baqylaýshy mártebesinde bolǵannan keıin keńestiń tolyqqandy múshesi atandy.
Sondaı-aq Islam damý bankiniń prezıdenti Muhammed Ál-Jasser keńes jumysyna baqylaýshy mártebesinde qosyldy. Memleket basshysynyń aıtýynsha, bank Qazaqstanmen ıslamdyq qarjylandyrýdy damytý, kásipkerlik pen shaǵyn jáne orta bıznesti qoldaý, sondaı-aq ekonomıkanyń shıkizattyq emes sektoryn órkendetý baǵytyndaǵy yntymaqtastyqty keńeıtýge múddeli.
Oǵan qosa, Presight AI kompanııasynyń bas dırektory Tomas Pramotedham keńeske baqylaýshy retinde qabyldandy. Qasym-Jomart Toqaev ony Qazaqstannyń «dosy ári senimdi seriktesi» dep atady. Buǵan deıin Presight AI kompanııasy Qazaqstannyń Kólik mınıstrligimen «aqyldy» avtomobıl joldary tehnologııalaryn damytý jónindegi kelisimge qol qoıǵan edi.
Otyrys aıasynda Memleket basshysy Qasym-Jomart Toqaev Eýropalyq qaıta qurý jáne damý bankiniń prezıdenti Odıl Reno-Bassomen ekijaqty kezdesý ótkizdi.
Aıta keteıik, Prezıdent Qasym-Jomart Toqaev Úkimettiń aldyna jańa ekonomıkalyq modelge kóshý mindetin qoıdy. Bıyl elimizde 200-den astam jańa óndiris oryndary ashylmaq. Bul ulttyq ekonomıkanyń odan ári damýyna, jańa jumys oryndaryn qurýǵa, qosylǵan quny joǵary ónim shyǵarýdy ulǵaıtýǵa eleýli serpin beredi.
EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin.
