Qasym-Jomart Toqaev «Samuryq-Qazyna» AQ basqarma tóraǵasyn qabyldady

ASTANA. KAZINFORM – Qasym-Jomart Toqaev «Samuryq-Qazyna» AQ basqarma tóraǵasy Nurlan Jaqypovty qabyldady. Bul týraly Aqorda habarlady.

Kompanııanyń tabysy:

2024 jyly taza tabysy 39 paıyzǵa, operatsııalyq tabysy 9 paıyzǵa ósken.

Іske qosylǵan ınfraqurylymdyq jobalar:

Ekibastuzdaǵy birinshi Memlekettik aımaqtyq elektr stansasynyń №1 energoblogy qalpyna keltirildi; Sıan qalasynda kólik-logıstıka termınaly jumys isteı bastady;

Almatynyń energetıka keshenine qajetti gaz ınfraqurylymynyń qurylysy aıaqtaldy;

Qarashyǵanaq ken ornynda gazdy keri aıdaýǵa arnalǵan besinshi kompressor paıdalanýǵa berildi.

Investıtsııalyq jobalar:

bıyl mamyr aıynda bıtým óndirisin keńeıtý jobasy bastaldy;

Jyl sońyna deıin taǵy 7 iri ınvestıtsııalyq jobany aıaqtaý josparlanyp otyr.

Mámileler:

Qazaq Air AQ áýe kompanııasy men «Mobaıl Telekom-Servıs» JShS (Tele2) uıaly baılanys operatoryn strategııalyq ınvestorlarǵa satý jóninde mámileler jasaldy. Bul naryqtaǵy básekelestikti arttyrýǵa jáne Qazaqstan ekonomıkasynyń negizgi sektorlaryna ınvestıtsııa tartýǵa yqpal etedi.

«Jaıly mektep» ulttyq jobasy:

Qazirgi kezde 106 mekteptiń qurylysy bitýge jaqyn, jyl sońyna deıin taǵy 102 oqý oshaǵyn salý josparlanǵan.

Prezıdent tapsyrmasy:

kompanııa aktıvteriniń tıimdiligin joǵarylatý, qunyn arttyrý; ınvestıtsııalyq jobalardy ýaqtyly jáne sapaly júzege asyrý jumystaryn jalǵastyrý. Qasym-Jomart Toqaev Azııa, Eýropa jáne AQSh-taǵy álemniń eń iri qorlarymen uzaqmerzimdi ınvestıtsııalyq yntymaqtastyq ornatýdyń mańyzdy ekenin atap ótti.

Prezıdent kólik salasyndaǵy kemshilikter úshin Marat Qarabaevqa sógis jarııalaǵanyn jazǵan bolatynbyz.