Toqaev Sadyr Japarovty Qyrǵyzstannyń Táýelsizdik kúnimen quttyqtady
ASTANA. KAZINFORM – Memleket basshysy Qyrǵyzstan Táýelsizdigine 35 jyl tolýyna oraı Prezıdent Sadyr Japarovqa quttyqtaý jedelhatyn joldady. Bul týraly Aqordanyń baspasóz qyzmeti habarlady.
— Bul aıtýly mereke qyrǵyz halqynyń erkindikke, derbestik pen táýelsizdikke umtylysyn aıshyqtaıdy. Osy jyldar ishinde Qyrǵyzstan el bolyp eńse tikteýden bastap, ornyqty damýǵa deıingi joldy abyroımen eńserdi. Memlekettiliktiń irgesin bekitip, baı rýhanı murasyn saqtap qaldy. Halyqaralyq arenada bedeldi elge aınaldy. Buǵan Qyrǵyz Respýblıkasynyń 2027-2028 jyldary BUU Qaýipsizdik Keńesiniń turaqty emes múshesi bolyp saılanýy jarqyn mysal bola alady, — dep jazylǵan quttyqtaýda.
Jedelhatta elderimizdi ǵasyrlardan tamyr tartatyn dostyq pen tatý kórshilikke negizdelgen baýyrlastyq qarym-qatynas baılanystyratyny atap ótilgen. Prezıdent strategııalyq seriktestik pen odaqtastyq qos halyqtyń ıgiligi jolynda qarqyndy túrde nyǵaıa beretinine senim bildirdi.
Qasym-Jomart Toqaev Sadyr Japarovtyń jaýapty memlekettik qyzmetine tabys, al baýyrlas qyrǵyz halqyna qut-bereke tiledi.
Aıta ketelik Sadyr Japarov Qazaqstan elshisiniń senim gramotalaryn qabyldaǵan edi.
