Qasym-Jomart Toqaev Rım Papasy XIV Leony Astanaǵa shaqyrdy
ASTANA. KAZINFORM — Memleket basshysy Rım Papasy XIV Leoǵa quttyqtaý jedelhatyn joldady, dep habarlaıdy Aqordanyń baspasóz qyzmeti.
Prezıdent Qasym-Jomart Toqaev Rım Papasy XIV Leony Pontıfık bolǵanyna bir jyl tolýymen quttyqtady.
Memleket basshysy hatta Pontıfıktiń beıbitshilik ıdeıasy men dıalogty ilgeriletý jónindegi dáıekti ýaǵyzy adamı qadir-qasıetti dáriptep, halyqtar men konfessııalar arasyndaǵy ózara túsinistikti nyǵaıtýdyń senimdi tiregi ekenin atap ótken. Prezıdent Qazaqstan men Kıeli Taq arasynda uzaq jyldan beri kele jatqan dostyq pen tyǵyz yntymaqtastyqty joǵary baǵalaıtynyn jáne baılanystardy odan ári tereńdetý nıetin jetkizdi.
Sondaı-aq Qasym-Jomart Toqaev Katolık shirkeýiniń basshysyn Astanaǵa shaqyratynyn taǵy da rastady.
— Sizdiń saparyńyz seriktestigimizge jańa mazmun darytyp, aımaqtaǵy eleýli ýaqıǵaǵa aınalatynyna senimdimin, — dedi Qazaqstan Prezıdenti.
Memleket basshysy Papa XIV Leoǵa izgi muratyn iske asyrý jolynda zor densaýlyq jáne qajymas qaırat tiledi.
Buǵan deıin Memleket basshysy Qasym-Jomart Toqaev Otan qorǵaýshy kúnimen quttyqtaǵanyn jazdyq.
