Qasym-Jomart Toqaev Reseımen birlesken jobalardy atady
ASTANA. KAZINFORM — Reseımen seriktestik aıasynda elimizde jaqyn arada 1 GVt ekologııalyq taza qýat kózi iske qosylady. Bul týraly Qazaqstan men Reseıdiń HH Óńiraralyq yntymaqtastyq forýmyna beınekonferentsııa rejıminde qatysqan Memleket basshysy Qasym-Jomart Toqaev aıtty.
Memleket basshysy bir jyl buryn Qazaqstan men Reseıdiń energetıkalyq júıeleriniń qosarlas jumys isteýin qamtamasyz etý jónindegi sharalar týraly úkimetaralyq kelisimge qol qoıylǵanyn eske saldy. Prezıdenttiń pikirinshe, ony iske asyrý taraptardyń energetıka sektoryndaǵy seriktestigin nyǵaıtýǵa múmkindik beredi.
«Kókshetaý, Semeı men Óskemen qalalaryndaǵy jylý elektr stantsııalarynyń qurylysy boıynsha naqty kelisim jasaldy. Seriktestigimiz jańartylatyn qýat kózderi salasynda da belsendi damyp keledi. Reseı tarapynyń qatysýymen elimizde jalpy qýaty 370 MVt bolatyn jobalar paıdalanýǵa berildi. Qol jetkizilgen ýaǵdalastyqtar aıasynda jaqyn arada 1 GVt ekologııalyq taza qýat kózin iske qosý josparlanǵan», - dedi Qasym-Jomart Toqaev.
Prezıdent bıyl Óndiristik kooperatsııa salasyndaǵy birlesken is-qımyl baǵdarlamasynyń qabyldanǵanyna bes jyl tolǵanyn aıtty. Atalǵan baǵdarlama aıasynda jalpy ınvestıtsııa kólemi 18,5 mıllıard dollarǵa jýyqtaıtyn 93 birlesken joba júzege asyryldy. Sonyń nátıjesinde 22 myńnan astam jumys orny paıda boldy.
«Bıyl «Tatneft» kompanııasynyń qatysýymen Saran qalasynda jylyna 3,5 mıllıon shına shyǵaratyn zaýyt ashyldy. «KamAZ» kompanııasymen seriktestik negizinde mashına jasaýǵa arnalǵan qural-jabdyqtardyń jergilikti óndirisi qolǵa alyndy. Qazan aıynda Qostanaıda jylyna 40 myń tonnaǵa deıin shoıyn quımasyn shyǵaratyn aýqymdy joba iske qosyldy. Kelesi jyly kóliktiń qozǵaltqysh beltemiriniń qosalqy bólshekterin shyǵaratyn zaýytty ashý josparlanǵan. Qazirgi kezde jalpy ınvestıtsııa kólemi 29,5 mıllıard dollardan astam 49 joba iske asyrylyp jatyr. Bul 20 myń adamdy jumyspen qamtıdy. Sonymen qatar Jambyl oblysynda «EvroHım» jáne «Ýralhım» kompanııalary mıneraldy tyńaıtqyshtar óndiretin aýqymdy jobalarǵa kiristi», - dedi Qasym-Jomart Toqaev.