Qasym-Jomart Toqaev Reseı prezıdentine Balqashta AES salýda batyl qoldaý kórsetkeni úshin alǵys aıtty
ASTANA. KAZINFORM – Memleket basshysy Qasym-Jomart Toqaev Reseı prezıdenti Vladımır Pýtınge Balqashta AES salý sheshiminde batyl qoldaý kórsetkeni úshin alǵys aıtty.
Qazaqstan Prezıdentiniń aıtýynsha, energetıka salasyn yntymaqtastyqtaǵy asa tabysty baǵyttardyń biri retinde atap ótýge tolyq negiz bar.
– Meniń oıymsha, búgin qol qoıylǵan Balqashta atom elektr stantsııasyn salý jónindegi kelisimniń mańyzy aıryqsha zor. Osy aýqymdy jobany iske qosýǵa jeke batyl qoldaý kórsetkeni úshin Reseı Federatsııasynyń Prezıdentine alǵysymdy bildiremin. Bul joba ǵylym, bilim berý jáne tehnologııalyq yntymaqtastyqtyń qozǵaýshy kúshine aınalady. Sondaı-aq energetıka men jalpy ındýstrııadaǵy jańa qosalqy salalardyń damýyna serpin beredi. Árıne, bul eń aldymen Qazaqstanǵa qatysty, – dedi Qasym-Jomart Toqaev Táýelsizdik saraıynda RF prezıdentimen kelissózderden keıingi BAQ ókilderine arnalǵan brıfıngte.
Aıta keteıik, 27-29 mamyr kúnderi Reseı Federatsııasy Prezıdenti Vladımır Pýtınniń Qazaqstanǵa memlekettik sapary ótedi. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Búgin Memleket basshysy Qasym-Jomart Toqaev Reseı Prezıdenti Vladımır Pýtındi Táýelsizdik saraıynda resmı qarsy aldy.
Buǵan deıin Reseıdiń tabıǵı resýrstar jáne ekologııa mınıstri Aleksandr Kozlov Qazaqstanǵa tartý etilgen Amýr jolbarystaryn jersindirý jóninde pikir bergen edi.
