Qasym-Jomart Toqaev Reseı prezıdentimen qandaı máselelerdi talqylaıtyndyǵyn atady
ASTANA. KAZINFORM – Astana men Máskeý Eýrazııa ekonomıkalyq odaǵy aıasynda tabysty jumys istep jatyr. Bul týraly Qazaqstan Prezıdenti Qasym-Jomart Toqaev «Izvestııa» gazetine jarııalanǵan maqalasynda jazdy.
«Astana men Máskeý Eýrazııa ekonomıkalyq odaǵy aıasynda tabysty jumys istep jatyr. Qazir bul qurylym Eýrazııa keńistigindegi ekonomıkalyq yqpaldastyqtyń mańyzdy tetigine aınaldy jáne halyqaralyq deńgeıde abyroı-bedelge ıe boldy. Bıyl Eýrazııa ekonomıkalyq odaǵyn qurý týraly shartqa 10 jyl toldy. Qazaqstan men Reseı jahandyq básekege qabiletin arttyrý úshin áýel bastan jan-jaqty yqpaldastyq pen baılanysty dáıekti túrde nyǵaıtýǵa umtyldy. Sol sebepti, birlestik qurý týraly bastama kóterip, osy uıymnyń negizin qalady. Sodan beri Eýrazııa ekonomıkalyq odaǵy oǵan múshe memleketterdiń ekonomıkalyq saıasatyn ıntegratsııalaý jáne ózara saýda-sattyqty damytý úderisi tabysty júzege asyp jatqan asa mańyzdy platforma retinde óziniń tıimdiligin kórsetti», — dedi Prezıdent.
Qasym-Jomart Toqaevtyń atap ótýinshe, Reseı Prezıdenti Vladımır Vladımırovıch Pýtınniń Qazaqstanǵa memlekettik sapary qazaq-orys qatynasynyń tarıhyndaǵy asa mańyzdy oqıǵa bolmaq. Joǵary memleketaralyq mártebesi bar bul sapar elderimiz arasyndaǵy strategııalyq seriktestiktiń mán-mańyzy aıryqsha ekenin kórsetedi.
«Astanada ótetin kezdesýde Reseı Prezıdentimen birge saýda-ekonomıka, kólik-logıstıka, otyn-energetıka, ǵylym jáne tehnıka salalaryndaǵy yntymaqtastyqqa qatysty aýqymdy máselelerdi talqylaımyz. Halyqaralyq uıymdar men ıntegratsııalyq qurylymdar aıasyndaǵy ózara yqpaldastyq barysyn pysyqtaýdy josparlap otyrmyz. Sondaı-aq, qazir, ókinishke qaraı, qatty ýshyǵyp turǵan álemdegi ahýalǵa qatysty pikir almasamyz. Biz, Qazaqstan halqy, elderimizdi álemdegi qurlyq arqyly ótetin eń uzyn shekara qosyp turǵanyn árdaıym este ustaımyz. Ony máńgi dostyq pen naǵyz tatý kórshiliktiń shekarasy dep sanaımyz. Eki jaqtyń shekara mańyndaǵy aýdandarynda 32 mıllıonǵa jýyq adam turady. Bul da aıryqsha mańyzdy. Eki eldiń aımaqtary bizdiń memleketaralyq qatynastarymyzdy nyǵaıtýǵa eleýli úles qosyp otyr. Sondyqtan memleket basshylarynyń Óńiraralyq yntymaqtastyqtyń HH forýmyna birge qatysýy osy sapar barysyndaǵy mańyzdy shara bolmaq. Aldaǵy sapar ınvestıtsııa jáne saýda salasyndaǵy yntymaqtastyqty jandandyrýǵa zor serpin berip, qos halyqtyń ıgiligine arnalǵan birlesken jobalardy bastaýǵa septigin tıgizedi dep senemin», — dep atap ótedi Memleket basshysy.
Eske sala keteıik, buǵan deıin Prezıdenttiń shaqyrýymen Vladımır Pýtın Qazaqstanǵa memlekettik saparmen keletinin jazǵan bolatynbyz.
