Qasym-Jomart Toqaev Dýshanbede Vladımır Pýtınmen kezdesti
DÝShANBE. KAZINFORM - Memleket basshysy Qasym-Jomart Toqaev Reseı Prezıdenti Vladımır Pýtınmen Dýshanbede kezdesti. Bul týraly Aqordanyń baspasóz qyzmeti habarlady.
Memleket basshysy jaqynda Reseıge saparmen baratynyn aıtty.
– 12 qarasha kúni Sizdiń shaqyrýyńyzben Reseıge saparmen baramyn. Biz buǵan erekshe mán berip otyrmyz. Bul sapar eki el arasyndaǵy strategııalyq seriktestik pen odaqtastyq qatynastarǵa tyń serpin beredi dep oılaımyn. Qazaqstan men Reseıdi shyn máninde máńgi odaqtastyq, strategııalyq seriktestik jáne dostyq qarym-qatynastar baılanystyrady. Kórsetkishterge kóńil tolady. Meniń Reseıge jasaıtyn saparymnyń aldynda ózara saýda kólemi joǵary deńgeıge jetti. Byltyr onyń kólemi 28 mıllıard dollardy qurady. Reseı bizdiń ekonomıkaǵa qarjy quıyp otyrǵan negizgi ınvestorlardyń biri. Osy jyldar ishinde Reseı bıznesi Qazaqstanǵa 26 mıllıard dollardan astam ınvestıtsııa saldy. Ótken jyldyń ózinde elimizge 4 mıllıard dollar ınvestıtsııa keldi. Birqatar iri jobalar júzege asyrylyp jatyr. Jalpy quny 22 mıllıard dollarǵa jýyq 114 jobanyń iske asyrylǵanyn mysalǵa alsaq ta jetkilikti. Bul baǵyttaǵy jumys áli de jalǵasady, – dedi Memleket basshysy.
Vladımır Pýtın Qazaqstanmen qarym-qatynasty joǵary baǵalaıtynyn atap ótti.
– Biz Qazaqstanmen qarym-qatynasty joǵary baǵalaımyz. Eki el arasyndaǵy baılanystardyń sıpaty erekshe. Buǵan Siz ben bizdiń dostyǵymyz ǵana yqpal etip otyrǵan joq. Óıtkeni Qazaqstan men Reseı postkeńestik keńistiktegi ıntegratsııalyq úderisterge bastamashy bolyp kele jatqany belgili. Bizde turaqty túrde nazar aýdaratyn ekijaqty máseleler jetkilikti. Óz tarapymnan Qazaqstan-Reseı baılanystaryn damytýǵa qosqan úlesińiz úshin Sizge alǵys aıtamyn. Ekijaqty formattaǵy osyndaı kezdesýlerimiz yntymaqtastyǵymyzdy damytý úshin paıdaly bolatynyna senimdimin, – dedi Reseı Prezıdenti.
Aıta keteıik, Prezıdent TMD-nyń gýmanıtarlyq yntymaqtastyq jónindegi memleketaralyq qory bazasynda Kreatıvti ındýstrııa qaýymdastyǵyn qurýdy usyndy.
Qasym-Jomart Toqaev TMD elderin tótenshe jaǵdaılardy boljaý ortalyǵyn qurýǵa shaqyrdy.
Qazaqstan Prezıdenti TMD memleketteri basshylary keńesiniń otyrysynda sóz sóıledi.
Qasym-Jomart Toqaev Dýshanbe qalasyna saparmen bardy.