Qasym-Jomart Toqaev Reseı Prezıdenti Vladımır Pýtınge alǵys aıtty

ASTANA. KAZINFORM - Prezıdent Qasym-Jomart Toqaev hatta Reseıge jasaǵan memlekettik saparynyń qorytyndysy boıynsha Vladımır Pýtınge rızashylyǵyn bildirdi, dep habarlaıdy Aqordanyń baspasóz qyzmeti.

– Jyly júzdesý, ózara senim, túsinistik pen ashyqtyq sıpatynda ótken kelissózder sapardyń sátti bolýyna septigin tıgizdi. Qazaqstan halqy muny zor yqylaspen qabyldady.

Qazaqstan men Reseıdiń memleketaralyq qarym-qatynasyn jan-jaqty strategııalyq seriktestik jáne odaqtastyq deńgeıine jetkizý jónindegi deklaratsııa aıryqsha mánge ıe.

Bul qujat elderimizdiń san qyrly yntymaqtastyǵyn aıtarlyqtaı nyǵaıtady, – dep jazdy Memleket basshysy.

Aıta keteıik, Memleket basshysy Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy.

Sapar barysynda Qazaqstan men Reseı prezıdentteri beıresmı kezdesý ótkizdi.

Qasym-Jomart Toqaev pen Vladımır Pýtınniń beıresmı pikiralmasýy keshki as ústinde jalǵasty.

Prezıdent «Belgisiz jaýynger beıiti» eskertkish memorıalyna gúl shoǵyn qoıyp, Reseı Federaldy Jınalysy Federatsııa keńesiniń tóraǵasymen kezdesti.

Sondaı-aq Kremlde Qasym-Jomart Toqaevty resmı qarsy alý rásimi ótti.

Sonymen qosa Qasym-Jomart Toqaev pen Vladımır Pýtın kelissózder qorytyndysy boıynsha Qazaqstan Respýblıkasy men Reseı Federatsııasynyń memleketaralyq qarym-qatynasyn jan-jaqty strategııalyq seriktestik jáne odaqtastyq deńgeıine deıin jetkizý jónindegi deklaratsııaǵa qol qoıdy.

Prezıdenttiń Reseıge memlekettik sapary barysynda 13 kelisimge qol qoıyldy.