Qasym-Jomart Toqaev: «Reseı — Qazaqstan — Ózbekstan» gaz jobasy tabysty nátıje kórsetti
TAShKENT. KAZINFORM – Prezıdent qazaq-ózbek shekarasynda ashylatyn Halyqaralyq ónerkásip kooperatsııasy ortalyǵy ózara saýdany damytýǵa sony serpin beretinine toqtaldy. Bul týraly Aqordanyń baspasóz qyzmeti habarlady.
Taǵy bir perspektıvti baǵyt — qurylys salasy. Qazaqstandyq kompanııalar «Jańa Tashkent» qala qurylysy jobalaryna, sondaı-aq turǵyn úı men áleýmettik nysandar salýǵa belsendi túrde atsalysyp jatyr. Buǵan deıingi kelisimderge sáıkes Tashkentte «Astana», Astanada «Tashkent» qonaq úıleri boı kóteredi.
Kelissózderdiń bir parasy kólik-tranzıt salasyn damytýǵa arnalǵan. Qazaqstan men Ózbekstan aýmaǵy arqyly ótetin júk tasymalynyń kólemi artqan.
— Bıylǵy 9 aıdyń qorytyndysy boıynsha elderimiz arasynda temirjolmen tasymaldaý kólemi 15 paıyzdan asa ósip, 22 mıllıon tonnadan asty. Aldaǵy ýaqytta da birlese otyryp, tarıf saıasatyn jetildirýge, júk tasymaly sharttaryn jeńildetýge, shekaradaǵy ótkizý beketterin jańǵyrtýǵa jáne keden júıesin tsıfrlandyrýǵa kelistik. Bul qadamdar elderimizdiń kólik baılanysyn nyǵaıtatynyna senimdimin, — dedi Prezıdent.
Energetıka salasynda mańyzdy jobalardy birlesip júzege asyrý boıynsha aýqymdy jumys atqarylýda.
— «Reseı — Qazaqstan — Ózbekstan» gaz jobasy tabysty nátıje kórsetti. Birlesken kúsh-jigerimiz arqyly kógildir otyndy tasymaldaý kólemin arttyrýǵa nıettimiz. Budan bólek, munaı men atom ónerkásibi salalaryndaǵy yntymaqtastyqty keńeıtýdiń perspektıvasy zor. Tatý kórshilik, ózara qurmet rýhynda jáne bir-birimizdiń múddelerimizdi eskere otyryp, sý energetıkasy salasyndaǵy áleýetimizdi úılestirý qajet ekenin atap óttik. Bul baǵytta syndarly yntymaqtastyqty jalǵastyrýǵa beıilmiz. Sý salasyna tsıfrlyq sheshimderdi engizýge, sý resýrstaryn esepke alý men monıtorıngteý júıesin birlese damytýǵa basymdyq beremiz. Aqparattyq tehnologııalar men jasandy ıntellekt baǵytyndaǵy yqpaldastyqty kúsheıtýdiń keleshegi mol. Bul rette elderimizdiń derbes jobalary bar. Olardy birlesip damytý búkil Ortalyq Azııaǵa mýltıplıkatıvti áser berer edi, — dedi Qasym-Jomart Toqaev.
Aıta ketelik prezıdentter kelissózderdiń jáne Qazaqstan men Ózbekstan Joǵary memleketaralyq keńesi ekinshi otyrysynyń qorytyndysy boıynsha Birlesken málimdeme qabyldaǵan edi.