Qasym-Jomart Toqaev Rakuten Group kompanııasynyń basshysy Hıroshı Mıkıtanıdi qabyldady

TOKIO. KAZINFORM –  Japonııadaǵy resmı sapary aıasynda Qazaqstan Prezıdenti Rakuten Group kompanııasynyń negizin qalaýshy, basqarma tóraǵasy jáne bas dırektory Hıroshı Mıkıtanımen kezdesti. Bul týraly Aqordanyń baspasóz qyzmeti habarlady. 

Memleket basshysy Rakuten tobynyń álemdegi eń ozyq jahandyq tsıfrlyq ekojúıe qalyptastyrýda qol jetkizgen jetistikterin joǵary baǵalady.

Qasym-Jomart Toqaevtyń aıtýynsha, tehnologııalyq damý men tsıfrlyq transformatsııanyń jańa kezeńine qadam basqan Qazaqstan kompanııa tájirıbesine zor qyzyǵýshylyq tanytady.

Prezıdent elimizde alǵash ret jasandy ıntellekt týraly zań qabyldanyp, birinshi ulttyq sýperkompıýter iske qosylǵanyn, elektrondyq úkimet qyzmeti men tsıfrlyq ekojúıe jetildirilip jatqanyn jetkizdi.

Osy oraıda Memleket basshysy Rakuten kompanııasynyń Qazaqstandaǵy qyzmet aıasyn keńeıtý, sondaı-aq Jasandy ıntellekt jáne tsıfrlyq damý mınıstrligimen tyǵyz qarym-qatynas ornatý nıetin quptady. Atap aıtqanda, elimiz kompanııanyń qaterli isik aýrýlaryn emdeýge arnalǵan bıotehnologııa salasyndaǵy ázirlemelerine qyzyǵýshylyq tanytady.

Hıroshı Mıkıtanı Qasym-Jomart Toqaevqa kompanııa jumysyna oń baǵa bergeni úshin alǵys aıtyp, Qazaqstan Prezıdentimen kezdesý zor mártebe ekenine toqtaldy. Ol elimizde tsıfrlyq bastamalardy damytýdyń joǵary qarqynyn atap ótip, olardy júzege asyrý úshin aýqymdy ınvestıtsııa tartylǵanyna nazar aýdardy.

Rakuten Group – Hıroshı Mıkıtanı 1997 jyly negizin qalaǵan japondyq tehnologııa konglomeraty. Kompanııa elektrondy kommertsııa, mobıldi baılanys, qarjy tehnologııalary, tsıfrlyq kontent, medıaqyzmet jáne basqa da onlaın servısterdi qamtıtyn tutas tsıfrlyq ekojúıeni damytady. Rakuten 30-dan asa elmen jáne óńirmen halyqaralyq seriktestik ornatqan.

Aıta ketelik Qazaqstan men Japonııa kelissóz qorytyndysynda resmı qujattarǵa qol qoıdy.