Qasym-Jomart Toqaev «Qazaq Digital Mektebi» shaǵyn jınaqty mektep úlgisin ázirleýdi usyndy
ASTANA. KAZINFORM — Jasandy ıntellekt tehnologııasy negizinde «Qazaq Digital Mektebi» atty shaǵyn jınaqty mektep úlgisin ázirleýimiz qajet. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Ekonomıkany jan-jaqty jańǵyrtý jumystary adam kapıtalyn damytýǵa qatysty jańa mindetter júkteıdi. Bul jerde bilim berý salasy aıryqsha ról atqarady. «Keleshek mektepteri» ulttyq jobasy aıasynda josparlanǵan 217 mekteptiń 150-i qazirdiń ózinde jumys istep tur. Qalǵan mektepterdiń qurylysy aldaǵy úsh aı ishinde aıaqtalýǵa tıis. Tsıfrlyq tehnologııalar jahandyq eńbek naryǵyn jyldam ózgertip jatyr. Álemde jasandy ıntellektimen jumys isteýdiń qyr-syryn biletin mamandarǵa degen suranys jyl ótken saıyn artyp keledi. Jumys úderisteriniń edáýir bóligi tsıfrlyq tehnologııalardy engizý arqyly avtomattandyrylatyny anyq. Sol sebepti, meniń tapsyrmammen 100 myńǵa jýyq stýdentti tehnologııalyq jobalarǵa tartýdy kózdeıtin Al-Sana baǵdarlamasy júzege asyryla bastady, — dedi Prezıdent.
Alaıda, Memleket basshysy jasandy ıntellektimen jumys isteý quziretin qalyptastyrý áldeqaıda erte jastan, ıaǵnı mektep qabyrǵasynan qolǵa alynýǵa tıistigin basa aıtty.
— Osyǵan oraı birqatar bastamany júzege asyrǵan jón. Eń aldymen, mektep oqýshylaryna arnalǵan jasandy ıntellekt negizderi týraly baǵdarlama jáne oqý materıaldaryn ázirleý qajet. Ustazdardyń jasandy ıntellekt tehnologııasyn meńgerý daǵdysyn da qalyptastyrý kerek bolady. Qashyqtan oqytý tásili jáne jasandy ıntellekt tehnologııasy negizinde «Qazaq Digital Mektebi» atty shaǵyn jınaqty mektep úlgisin ázirleýimiz qajet. Mundaı platforma aýyldaǵy oqýshylardy sapaly oqý tásilderimen qamtamasyz etýge múmkindik beredi. Elordada balalardy damytý ortalyqtaryn jeke qarajat tartý arqyly salý tájirıbesi bar. Muny barlyq aımaqqa taratý qajet. Kóptegen kásipker dál osy másele boıynsha kómek kórsetýge ázir ekenin bildirip jatyr. Ákimder osyndaı jobalardy júzege asyrýǵa kásipkerlerdi belsendi túrde jumyldyrýy kerek, — dedi Qasym-Jomart Toqaev.
Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.