Qasym-Jomart Toqaev Premer-Mınıstrdiń birinshi orynbasary Roman Sklıardy qabyldady
ASTANA. KAZINFORM — Memleket basshysy Qasym-Jomart Toqaev Premer-Mınıstrdiń birinshi orynbasary Roman Sklıardy qabyldady. Bul týraly Aqordanyń baspasóz qyzmeti málim etti.
Prezıdentke ındýstrııalyq jobalardy júzege asyrý jáne otandyq taýar óndirýshilerdi qoldaý baǵytynda atqarylyp jatqan jumystar týraly baıandaldy. Roman Sklıardyń aıtýynsha, birinshi jartyjyldyqta óndeý ónerkásibi 105,1 paıyzǵa, mashına jasaý salasy 9,4 paıyzǵa, al taý-ken jáne metallýrgııa kesheni 8,3 paıyzǵa ósken.
«Memleket basshysyna munaı jáne gaz qubyrlaryn salýmen, gaz óńdeý zaýyttary men munaı hımııasy óndirisin iske qosýmen baılanysty jobalardyń oryndalý barysy tanystyryldy. Jyl basynan beri 44,7 mıllıon tonna munaı men gaz kondensaty, sondaı-aq 30 mıllıard tekshe metr gaz óndirilgen. Osy jyldyń sońyna deıin 128 eldi mekenge gaz qubyry júrgizilip, kógildir otynmen qamtamasyz etý deńgeıi 61,8 paıyzǵa jetedi», — delingen habarlamada.
Budan bólek kólik jáne energetıka salalaryndaǵy jańa ınfraqurylymdyq jobalar jóninde baıandaldy.
Roman Sklıar Prezıdentke jylytý maýsymyna daıyndyq barysy jóninde málimet berdi. Qazirgi kezde 309 shaqyrym jylý jelisin rekonstrýktsııalaý jáne kúrdeli jóndeý jumystary júrgizilip jatyr. Buǵan shamamen 154 mıllıard teńge jumsalady. Sonymen qatar bıyl jalpy somasy 327 mıllıard teńgege 10 energııa blogyn, 55 qazandyqty jáne 45 týrbınany kúrdeli jóndeýden ótkizý josparlanǵan.
Qasym-Jomart Toqaevqa Investıtsııa tartý jónindegi keńestiń qyzmeti, atap aıtqanda sheteldik seriktestermen birge iske asyrylyp jatqan iri ınvestıtsııalyq jobalar jóninde aıtyldy. Olardyń birqataryna qatysty ýaǵdalastyqqa Memleket basshysynyń shetelderge sapary kezinde qol jetkizilgen.
Keńes qyzmetin qaıta qurylymdaǵan sátten bastap jalpy somasy 40 mıllıard dollarǵa jýyq 77 ınvestıtsııalyq jobanyń túıtkildi máseleleri sheshimin tapty. Bul rette mashına jasaý, tamaq jáne hımııa ónerkásibi, taý-ken, metallýrýgııa kesheni, energetıka, jer qoınaýyn paıdalaný salalaryndaǵy qosylǵan quny joǵary jobalarǵa aıryqsha mán berilip otyr.
Prezıdent qabyldanyp jatqan sharalardyń mańyzdy ekenine nazar aýdaryp, atalǵan baǵyttar boıynsha jumysty odan ári jalǵastyrýdy tapsyrdy.
