Qasym-Jomart Toqaev Premer-mınıstr Shahbaz Sharıfke alǵys aıtyp, Pákistan halqyna rızashylyǵyn bildirdi
ISLAMABAD.KAZINFORM - Memleket basshysy Pákistan Premer-mınıstri Shahbaz Sharıfpen júrgizgen kelissózderiniń qorytyndysy boıynsha BAQ ókilderiniń aldynda sóz sóıledi.
Aqordanyń baspasóz qyzmetiniń habarlaýynsha, Prezıdent Qasym-Jomart Toqaev Pákistanǵa memlekettik saparmen kelýge shaqyrǵany úshin Premer-mınıstr Shahbaz Sharıfke alǵys aıtyp, qazaq delegatsııasyn qonaqjaılyqpen qarsy alǵan Pákistan halqyna rızashylyǵyn bildirdi.
Sondaı-aq tarıhy tereń, mádenıeti baı, halyqaralyq sahnadaǵy bedeli bıik baýyrlas Pákistanǵa kelgenine qýanyshty ekenin jetkizdi.
– Pákistan – Qazaqstannyń Ońtústik Azııadaǵy jáne odan tysqary jerlerdegi senimdi ári mańyzdy seriktesi. Halyqtarymyzdy Uly Jibek jolynan bastaý alǵan taǵdyrly baılanys pen mádenı-rýhanı sabaqtastyq jalǵap keledi. Bizdiń qundylyqtarymyz ben dástúrlerimiz úndes, nıetimiz ben tilegimiz ortaq, muratymyz bir. Úkimetterimiz ben iskerlik orta deńgeıinde syndarly saıası dıalog, ornyqty ekonomıkalyq qatynastar qalyptasyp, júıeli túrde nyǵaıýda. Búgin qadirli Premer-mınıstr myrzamen tarıhı qujatqa – Qazaqstan men Pákistan arasynda strategııalyq seriktestik ornatý týraly birlesken deklaratsııaǵa qol qoıdyq. Bul qujat ózara baılanystardy jańa deńgeıge kóterýge, sondaı-aq ekijaqty jáne kópjaqty kún tártibiniń barlyq spektri boıynsha yntymaqtastyqty keńinen damytýǵa jol ashady. Elderimiz arasyndaǵy dostyq qatynastardy jáne ózara tıimdi yqpaldastyqty tereńdetýge Pákistan Premer-mınıstri Shahbaz Sharıf aıtarlyqtaı zor úles qosty. Sol úshin oǵan alǵys aıtamyn, – dedi Memleket basshysy.
Qasym-Jomart Toqaev Shahbaz Sharıfti elin alǵa batyl bastaǵan kóregen kóshbasshy dep atady. Onyń keleshekke baǵdarlanǵan salıqaly saıasat júrgizýiniń arqasynda Islamabadtyń aımaqtaǵy jáne álemdegi bedeli jyldan jylǵa artyp keledi.
– Byltyr Pákistan Birikken Ulttar Uıymy Qaýipsizdik keńesiniń turaqty emes múshesi bolyp saılandy. Eldiń syndarly ári jaýapty qadamdary aımaqtaǵy beıbitshilik pen turaqtylyqty nyǵaıtýǵa septigin tıgizdi. Pákistannyń ekonomıkalyq áleýeti zor, ónerkásiptik bazasy damyǵan, kólik-tranzıt múmkindikteri mol. Pákistannyń aýyl sharýashylyǵy, jeńil ónerkásibi, medıtsına ónimderi halyqaralyq naryqta keńinen taralǵan. Áskerı-ónerkásiptik kesheniniń serpindi damýy álemdik deńgeıde tanylǵan. Dostas halyqtyń túrli salalardaǵy árbir jetistigine shyn júrekten rızamyz, sizderge árdaıym tilekshimiz, – dedi Qazaqstan Prezıdenti.
Aıta keteıik, Prezıdent Qasym-Jomart Toqaev Pákistanǵa memlekettik saparmen bardy.