Qasym-Jomart Toqaev Ýkraına tarapynyń bastamasymen Vladımır Zelenskıımen telefon arqyly sóılesti

ASTANA. KAZINFORM – Ýkraına tarapynyń bastamasymen Prezıdent Qasym-Jomart Toqaev pen Prezıdent Vladımır Zelenskıı telefon arqyly sóılesti, dep habarlaıdy Aqordanyń baspasóz qyzmeti.

Qasym-Jomart Toqaev qazaq halqynyń ýkraın halqyna, onyń tarıhyna, mádenıetine jáne tiline erekshe qurmetpen qaraıtynyn atap ótti.

Memleket basshysy Qazaqstannyń Ýkraınada halyqaralyq quqyq qaǵıdattary negizinde beıbitshilik ornaýyna sózsiz múddeli ekenin jetkizdi. Atap aıtqanda, Prezıdent Astananyń áýel bastan ádildik negizinde beıbitshilik formýlasyn birlese izdeýdi jaqtaǵanyn, BUU Jarǵysyn, memleketterdiń egemendigi men aýmaqtyq tutastyǵyna qolsuqpaýshylyq qaǵıdatyn saqtaý týraly júıeli túrde pikir bildirgenin eske saldy.

Qasym-Jomart Toqaevtyń pikirinshe, qazirgideı óte kúrdeli jaǵdaıda Ýkraına memlekettiligin saqtaý men qorǵaýdy qamtamasyz ete otyryp, qaqtyǵysty baıypty túrde sheshý mańyzdy. Memleket basshysy taraptar «Janjaldan, jaman bolsa da bitim artyq» degen kóneden kele jatqan danalyqqa saı áreket etýge tıis dep sanaıdy.

Qazaqstan Prezıdenti terrıtorııalyq túıtkildiń kúrdeli ekenin túsinetinin aıtty.

Bul – halyqaralyq qatynastardaǵy eń qıyn másele. Kóbine beıbitshilik týraly kelisimge qol jetkizý, tipti bitimge kelý jolynda eńserilýi qıyn kedergige aınalady. Biraq qazirgi eń basty mindet – qaýipsizdigine halyqaralyq kepildik berý arqyly Ýkraına eliniń memlekettiligin saqtaý.

Sonymen qatar Qasym-Jomart Toqaev Qazaqstan Ýkraınamen ózara múddege saı keletin túrli salada belsendi yntymaqtastyq qurýǵa nıetti ekenin atap ótti.

Aıta keteıik, AQSh prezıdenti Donald Tramp osyǵan deıin Reseı men Ýkraınanyń beıbit kelisimge kelýi tıis ekeni týraly aıtqan bolatyn.