Qasym-Jomart Toqaev pen Vladımır Pýtın telefon arqyly sóılesti

ASTANA. KAZINFORM – Prezıdent Qasym-Jomart Toqaev Reseı prezıdenti Vladımır Pýtınmen telefon arqyly sóılesti. Bul týraly Aqordanyń baspasóz qyzmeti habarlady. 

Memleket basshysy áriptesin AQSh Prezıdenti Donald Tramppen Ankorıdjde ótken kezdesý qorytyndysymen quttyqtady. 

Prezıdenttiń pikirinshe, kelissózder Reseıdiń Ýkraına jónindegi ustanymyn amerıkalyq taraptyń jaqsy túsinýine septigin tıgizdi. Bul kúrdeli máseleniń sheshimin izdeýde ortaq til tabysýǵa kómektesedi.

Qasym-Jomart Toqaev Alıaskadaǵy sammıtti Reseıdiń halyqaralyq pozıtsııasyn jáne álemdik arenadaǵy ózara túsinistikti nyǵaıtý turǵysynan aıtýly kezdesý boldy dep sanaıdy.

Memleket basshysy sapardyń sátti uıymdastyrylǵanyn atap ótti. Qazirgideı kúrdeli jaǵdaıda munyń saıası máni zor.

Vladımır Pýtın óz tarapynan áriptesine Alıaskada ótken kelissózdiń keıbir naqty aspektileri týraly málimet berdi.

Áńgimelesý sońynda Qazaqstan Prezıdenti Reseı Prezıdentine energetıka salasyndaǵy konstrýktıvti yntymaqtastyq úshin rızashylyq bildirdi.

Buǵan deıin Prezıdenttiń Pákistan Premer-mınıstri Shahbaz Sharıfke kóńil aıtý jedelhatyn joldaǵanyn habarlaǵan edik.