Qasym-Jomart Toqaev pen Vladımır Pýtın shaǵyn quramda kelissóz júrgizdi
XIX Óńiraralyq yntymaqtastyq forýmynyń plenarlyq otyrysynan keıin Qazaqstan men Reseı prezıdentteri shaǵyn formatta kelissóz júrgizdi, dep habarlaıdy Aqordanyń baspasóz qyzmeti.
Qasym-Jomart Toqaev Vladımır Pýtınniń sapary ekijaqty qatynastar jylnamasyndaǵy mańyzdy oqıǵa ekenin atap ótti.
– Siz Qazaqstanǵa HHІ ǵasyrdaǵy tatý kórshilik jáne odaqtastyq týraly sharttyń 10 jyldyǵy qarsańynda kelip otyrsyz. Qujatqa 2013 jyly 11 qarasha kúni Ekaterınbýrgte qol qoıylǵanyn eske salǵym keledi. Bul – Qazaqstan men Reseı yntymaqtastyǵynyń mańyzdy quqyqtyq negizi sanalatyn ári kópjaqty baılanystarymyzdy odan ári nyǵaıtýǵa jol ashatyn jan-jaqty qujat. Sizdi osy aıtýly kúnmen quttyqtaımyn. Saparyńyzdyń atalǵan datamen tuspa-tus kelgeni óte jaqsy boldy. Jalpy, búgin aıtqanymdaı, Sizdiń saparyńyzdyń saıası jáne tarıhı máni zor, – dedi Prezıdent.
Memleket basshysy eki halyq arasyndaǵy berik dostyq baılanystarǵa, ortaq tarıh pen tatý kórshilik qatynastarǵa mán bere otyryp, Qazaqstan men Reseıdiń barlyq baǵyttaǵy yqpaldastyǵynyń tabysty damyp kele jatqanyn málimdedi.
– Forýmnyń ashylýynda naqty tsıfrlardy atap kórsettik. Sońǵy 3 jylda taýar aınalymynyń kólemi 30 paıyzdan astam ósti jáne bul oń úrdis jalǵasýda. Bıylǵy 8 aıdyń qorytyndysy boıynsha ózara saýda-sattyq 17 mıllıard dollardy qurady. Bul da – rekordtyq kórsetkish. Ónerkásiptik kooperatsııa qarqyndy damyp jatyr. Osy oraıda aýyz toltyryp aıtarlyqtaı tsıfrlar bar. Atap aıtqanda, jalpy somasy 33 mıllıard dollardan asatyn 143 joba júzege asyrylýda. Onyń 140 jobasy Qazaqstan aýmaǵynda ornalasqan. Reseı Qazaqstandaǵy sheteldik kapıtaly bar kásiporyndar sany boıynsha kóshbasshy ekeni sózsiz. Elimizde 20 myńnan astam reseılik kompanııa tirkelgen. Reseı Federatsııasynan tartylǵan tikeleı ınvestıtsııa, bizdiń baǵalaýymyz boıynsha, 20 mıllıard dollardan asty. Sońǵy eki jylda shamamen 3,5 mıllıard dollar ınvestıtsııa salyndy. Óz kezeginde Qazaqstannyń Reseıge quıǵan ınvestıtsııa kólemi 6 mıllıard dollarǵa jetti. Munyń ekijaqty protsess ekeni qýantady. Munaı-gaz salasyndaǵy yntymaqtastyq belsendi túrde ilgerilep keledi. Elimizdiń aýmaǵy arqyly Reseı munaıyn Qytaıǵa, sondaı-aq gazyn Ózbekstanǵa tasymaldaý jónindegi ýaǵdalastyqtar energetıka salasyndaǵy yqpaldastyqty múlde jańa deńgeıge kóterdi, – dedi Qasym-Jomart Toqaev.
Memleket basshysy Qostanaı qalasynda ótip jatqan XIX Óńiraralyq yntymaqtastyq forýmy sheńberinde qol qoıylatyn kelisimder men bıznes kelisimsharttary oblystarda ǵana emes, eki el ekonomıkasynyń kóptegen salalarynda da mol áleýet bar ekenin kórsetetinine senim bildirdi.
Óz kezeginde Reseı Prezıdenti Vladımır Pýtın Qazaqstan astanasyndaǵy búgingi kezdesý ekijaqty qatynastardyń jaı-kúıi jóninde pikir almasyp, keleshekti baǵamdaýǵa jaqsy múmkindik beretinin atap ótti.
– Elderimiz arasyndaǵy strategııalyq seriktestik pen odaqtastyq qatynastar senimdi túrde ári tabysty damyp keledi. Ony, álbette, tsıfrlar áıgilep tur. Biz jańa ǵana XIX Óńiraralyq yntymaqtastyq forýmynyń plenarlyq otyrysyna qatystyq. Bul – óte jaqsy format. Adamdar bir-birimen tikeleı qarym-qatynas jasap, jumys isteıdi, aralasady ári bul árdaıym eleýli nátıje beredi. Osy joly da solaı bolaryna senimdimin. Buǵan qosa óte mańyzdy taqyryp tańdalyp otyr. Azyq-túlik – kez kelgen qoǵamnyń, memlekettiń tynys-tirshiliginiń negizi. Elderimizdiń áleýeti zor. Óz qajettilikterimizdi ǵana qamtamasyz etip qana qoımaı, jahandyq naryqtardaǵy kóptegen seriktesterimizge de kómektesýge múmkindigimiz bar. Másele yntymaqtamastyǵymyzdyń barlyq artyqshylyǵyn paıdalanyp, keleshekte osy múmkindikterdi arttyrýda ǵana bolyp tur. Arǵy kúni Reseı men Qazaqstan arasynda HHІ ǵasyrdaǵy tatý kórshilik jáne odaqtastyq týraly shartqa qol qoıylǵanyna 10 jyl tolady. Bul bizdiń kópjaqty dostyq qarym-qatynasymyzdy damytýdyń berik negizine aınaldy, – dedi Vladımır Pýtın.
Reseı Prezıdenti eki memlekettiń halyqaralyq arenadaǵy konstrýktıvti yqpaldastyǵyn, EAEO, UQShU, TMD, BUU jáne ShYU aıasyndaǵy úılesimdi qarym-qatynasyn joǵary baǵalady. Sondaı-aq ol 2024 jyly Reseıdiń BRIKS pen TMD-ǵa, al Qazaqstannyń UQShU-ǵa tóraǵalyǵy sheńberinde ózara qoldaý kórsetýge daıyn ekenin rastady.
Kelissóz barysynda memleketter basshylary strategııalyq áriptestikti nyǵaıtýǵa degen ózara umtylysyn naqtylady. Óńiraralyq jáne shekara mańyndaǵy eldi mekender arasyndaǵy yntymaqtastyqty odan ári damytýǵa erekshe nazar aýdaryldy. Sondaı-aq taraptar munaı-gaz ónerkásibi, mashına jasaý, energetıka, kólik-logıstıka, densaýlyq saqtaý jáne mádenı-gýmanıtarlyq baılanys salalaryndaǵy yqpaldastyqtyń negizgi aspektilerin talqylady.
Budan bólek, Qazaqstan men Reseı prezıdentteri halyqaralyq ahýaldyń qazirgi jaǵdaıy men damý perspektıvalary jóninde pikir almasty.
