Qasym-Jomart Toqaev pen Vıktor Orban keńeıtilgen quramda kelissóz júrgizdi

BÝDAPEShT. KAZINFORM — Qazaqstan Prezıdenti men Majarstan Premer-mınıstri eki eldiń resmı delegatsııa músheleriniń qatysýymen keńeıtilgen quramda kelissóz júrgizdi.

Qasym-Jomart Toqaev majar tarapyna arnaıy shaqyrýy jáne kórsetken syı-qurmeti úshin rızashylyǵyn bildirip, qos halyqtyń tarıhı jáne mádenı jaqyndyǵyn atap ótti.

– Dostas ári baýyrlas Majarstannyń astanasyna kelgenime qýanyshtymyn. Búgingi saparymnyń basty maqsaty – eki el arasyndaǵy kópjosparly yntymaqtastyqqa tyń serpin berý, – dedi Memleket basshysy.

Taraptar ekijaqty yqpaldastyqtyń ózekti máselelerin talqylap, birqatar mańyzdy ýaǵdalastyqqa qol jetkizdi. Atap aıtqanda, Qazaqstan – Majarstan ınvestıtsııalyq qoryn qurýǵa kelisti. Kelissóz barysynda saýda-ekonomıka, energetıka, munaı-gaz, kólik, bilim salalaryndaǵy baılanystardyń negizgi baǵyttary talqylandy.

Vıktor Orban ekijaqty qarym-qatynasty jandandyrýdyń mańyzdy ekenin atap ótip, qol jetkizilgen kelisimderdiń tabysty júzege asatynyna senim bildirdi.

– Eki eldiń tarıhy ortaq jáne yntymaqtastyqty nyǵaıtýǵa múmkindik mol. Búgingi kelissózder halyqtarymyzdyń múddeleri úshin ózara yqpaldastyqty odan ári damytýǵa negiz bolady, – dedi Majarstan Premer-mınıstri.

Kezdesý sońynda Qasym-Jomart Toqaev Vıktor Orbandy Astanaǵa saparmen kelýge shaqyrdy.