Qasym-Jomart Toqaev pen Ýılıam Rýto «Qazaqstan-Kenııa» bıznes forýmyna qatysty
ASTANA. KAZINFORM – Qasym-Jomart Toqaev pen Ýılıam Rýto «Qazaqstan-Kenııa» bıznes forýmyna qatysty. Memleket basshysy qazirgi ýaqytta Qazaqstan men Kenııa arasyndaǵy qarym-qatynas qarqyndy damyp kele jatqanyn atap ótti, dep habarlaıdy Aqordanyń baspasóz qyzmeti.
Bul saıası sheshimderdi bekitýge jáne ekijaqty baılanystardy nyǵaıtýǵa qos taraptyń da nıetti ekenin kórsetedi.
– Prezıdent Ýılıam Rýtomen júrgizgen nátıjeli ári mazmundy kelissóz barysynda kóptegen baǵyttaǵy ózara tıimdi yntymaqtastyqty tereńdetýge nıetti ekenimizdi rastadyq. Sondaı-aq seriktestiktiń jańa baǵyttaryn aıqyndadyq. Ekonomıkalyq baılanystarymyz taıaý arada naqty iske ulasady dep oılaımyn, – dedi Prezıdent.
Qasym-Jomart Toqaev ekonomıkalyq seriktestikti jandandyrý boıynsha birqatar bastama kóterdi.
– Saýda men ınvestıtsııa salasyndaǵy dıalogtyń arnaýly platformasyna aınalatyn «Qazaqstan – Kenııa» iskerlik keńesin bekitý qajet. Bıznes-mıssııalardyń barys-kelisin turaqty túrde uıymdastyrý kompanııalardyń órkendeýine yqpal etedi. Qazaqstannyń Kenııadaǵy bıznes máselelerin úılestirý boıynsha Qurmetti konsýlyn taǵaıyndaý elderimizdiń kásipkerleri arasyndaǵy baılanysty arttyrýǵa septigin tıgizedi. Sonymen qatar kólik-logıstıka ınfraqurylymyn jaqsartý perspektıvasy men tyń múmkindikterdi paıdalaný jónindegi sarapshylar tobyn qurý usynylady. Osy sharalardy iske asyrý mınıstrler deńgeıindegi Saýda-ekonomıkalyq yntymaqtastyq boıynsha úkimetaralyq komıssııany tezdetip qurýǵa berik negiz bolady dep senemin. Sondaı-aq bıznes tájirıbelerin zerdeleý úshin Kenııaǵa iskerlik orta ókilderinen quralǵan top jiberýge ýaǵdalastyq, – dedi Memleket basshysy.
Osyǵan deıin Qazaqstan men Kenııa birqatar qujatqa qol qoıǵan bolatyn.
Prezıdentter «Qazaqstan-Kenııa» bıznes forýmyna qatysýshylarmen sýretke tústi.
