Qasym-Jomart Toqaev pen Thonglýn Sısýlıt keńeıtilgen quramda kelissóz júrgizdi
ASTANA. KAZINFORM — Delegatsııa músheleriniń qatysýymen ótken kelissóz barysynda Qazaqstan men Laos prezıdentteri eki el arasyndaǵy saıası, saýda-ekonomıkalyq jáne mádenı-gýmanıtarlyq yntymaqtastyqtyń damý perspektıvasyn talqylady. Bul týraly Aqordanyń baspasóz qyzmeti habarlady.
Memleket basshysy Laos Halyq Demokratııalyq Respýblıkasy Prezıdentiniń elimizge jasaǵan alǵashqy resmı sapary ekijaqty baılanystardy nyǵaıtýǵa tyń serpin beretinin jetkizdi.
Sondaı-aq Qazaqstan Laosty Ońtústik-Shyǵys Azııadaǵy mańyzdy seriktes retinde qarastyratynyn atap ótti.
– Biz Qazaqstan men Laos arasyndaǵy saýda-ekonomıkalyq yqpaldastyqty odan ári damytýǵa nıettimiz. Bul qarym-qatynasymyzdy nyǵaıta túsýge berik negiz bolady dep oılaımyz. Laos naryǵyna jetkiziletin qazaqstandyq taýar kólemin keńeıtýdiń múmkindigi mol ekenin kórip otyrmyz. Eń aldymen, metall, taǵam, munaı hımııasy, aýyl sharýashylyǵy, hımııa ónerkásibi, mashına jasaý jáne farmatsevtıka ónimderin tasymaldaı alamyz, – dedi Prezıdent.
Memleket basshysy eki eldiń kólik-logıstıka salasyndaǵy yqpaldastyǵyna nazar aýdaryp, Laostyń bul baǵyttaǵy tabysyn joǵary baǵalady.
– Qazaqstan Ortalyq Azııada toǵyz joldyń torabynda ornalasqan. Qytaı men Eýropany jalǵaıtyn Transkaspıı halyqaralyq kólik baǵdaryn belsendi túrde damytyp keledi. Qytaı men Eýropa arasyndaǵy qurlyq jolymen tasymaldanatyn júktiń 85 paıyzy elimiz arqyly ótedi. Grýzııanyń Batýmı jáne QHR-dyń Lıanıýngan porttarynda qazaqstandyq termınaldar jumys isteıdi. Biz Qytaıdyń Sıan qalasynda Qazaqstannyń logıstıkalyq habyn iske qostyq. Osy platformalardy laostyq júk tasymaldaýshylar paıdalana alady. Laos ónimderin Ortalyq Azııa men Eýropaǵa bizdiń kólik dálizderi arqyly shyǵarýǵa bolady. Qazaqstan da Laos arqyly Ońtústik-Shyǵys Azııaǵa tasymaldaıtyn ónim kólemin ulǵaıtýǵa nıetti. Biz Laostyń teńizge shyǵatyn joly joq elden Ońtústik-Shyǵys Azııa elderin baılanystyrýshy elge aınalý jolyndaǵy jetistikterin joǵary baǵalaımyz. Laos – Qytaı temirjoly eldiń tranzıttik áleýetin kúsheıtip, ASEAN elderin Qytaımen jáne Eýropamen jalǵaýǵa jol ashty. Osy oraıda, úkimetterimiz kólik-logıstıka salasy boıynsha úkimetaralyq jáne vedomstvoaralyq kelisimder bekitýdi pysyqtaýy qajet, – dedi Qazaqstan Prezıdenti.
Aıta ketelik Qasym-Jomart Toqaev Táýelsizdik saraıynda Laos Prezıdentin qarsy alǵan edi.
