Qasym-Jomart Toqaev pen Shavkat Mırzıeev Buharadaǵy Ahýaldyq ortalyqqa bardy
BUHARA. KAZINFORM – Qazaqstan men Ózbekstan memleketteriniń basshylary Buhara oblysynyń jańa Ahýaldyq ortalyǵynyń qyzmetimen tanysty. Bul týraly Aqordanyń baspasóz qyzmeti habarlady.
Onda táýlik boıy óńirdegi ahýalǵa, sonyń ishinde ınfraqurylym jaǵdaıyna, turǵyn úı-kommýnaldyq sharýashylyǵyna, kólik júıesine, qaýipsizdik qyzmetine jáne tabıǵı protsesterge baqylaý júrgiziledi.
Ahýaldyq ortalyq tótenshe oqıǵalar kezinde shuǵyl qyzmetterdiń is-qımylyn úılestirip, yqtımal syn-qaterlerge tosqaýyl qoıý úshin jaǵdaıdyń órbýin modeldeýdi júzege asyrady.
Buǵan deıin Memleket basshysynyń Ózbekstanǵa jumys saparymen barǵanyn jazǵan edik. Sodan keıin Qasym-Jomart Toqaev pen Shavkat Mırzıeev Bahaýddın Naqyshbandı memorıaldyq keshenin aralady.
Sondaı-aq Memleket basshysy Qasym-Jomart Toqaev Ózbekstan prezıdenti Shavkat Mırzıeevpen Buharada beıresmı kezdesý ótkizdi.
