Qasym-Jomart Toqaev pen Shahbaz Sharıf sport kesheniniń ashylý rásimine qatysty
ISLAMABAD.KAZINFORM - Prezıdent Qasym-Jomart Toqaevtyń memlekettik sapary aıasynda Islamabadta ál-Farabı, Qanysh Sátpaev jáne Qoja Ahmet ıAsaýı atyndaǵy mádenı-bilim berý ortalyqtarynyń, sondaı-aq «Dostyq» sport kesheniniń ashylý saltanaty ótti, dep habarlaıdy Aqordanyń baspasóz qyzmeti.
Ál-Farabı ortalyǵy ál-Farabı atyndaǵy Qazaq ulttyq ýnıversıteti men «Kaıd-ı-Azam» ýnıversıteti (Quaid-i-Azam University) arasyndaǵy yntymaqtastyq sheńberinde ashyldy. Ǵımarat oqý-ádistemelik jáne ǵylymı ádebıettermen, sonymen birge zamanaýı kompıýterlik qural-jabdyqtarmen, jıhazben qamtylǵan. Ortalyq bazasynda qazaq tili kýrstary uıymdastyrylmaq.
Qanysh Sátpaev ortalyǵy Q. Sátpaev atyndaǵy Qazaq ulttyq tehnıkalyq zertteý ýnıversıteti (Satbayev University) men Pákistan ulttyq ǵylym jáne tehnologııa ýnıversıteti arasyndaǵy ǵylym, bilim berý, sondaı-aq tehnologııa salalaryndaǵy ekijaqty yntymaqtastyqty damytý jónindegi ýaǵdalastyqtarǵa sáıkes jumys isteıtin bolady.
Qoja Ahmet ıAsaýı ortalyǵy Qoja Ahmet ıAsaýı atyndaǵy Halyqaralyq qazaq-túrik ýnıversıteti men Islamabad Halyqaralyq ıslam ýnıversıtetiniń kelisimi boıynsha ashyldy.
«Dostyq» sport ortalyǵynda toǵyzqumalaq jáne qazaq kúresi boıynsha pákistandyq federatsııalar qurý, Qazaqstan shahmat akademııasynyń, Qazaq batyry aralas jekpe-jeginiń fılıaldaryn ashý, sondaı-aq eki eldiń grepplıng pen boks federatsııalary arasyndaǵy yntymaqtastyqty damytý kózdelip otyr. Qos memleket pákistandyq jattyqtyrýshylar men sportshylardy oqytý úshin birlesken oqý-jattyǵý jıyndaryn qolǵa almaq.
Osyǵan deıin Qazaqstan men Pákistan ǵylym jáne bilim salasyndaǵy baılanysty odan ári damytýǵa ýaǵdalasqany týraly jazdyq.