Qasym-Jomart Toqaev pen Sadyr Japarov kelissóz júrgizdi
BІShKEK. KAZINFORM — Qazaqstan Prezıdenti baýyrlas Qyrǵyz Respýblıkasyna resmı saparmen kelýge shaqyrǵany úshin Sadyr Japarovqa alǵys aıtty. Bul týraly Aqordanyń baspasóz qyzmeti habarlady.
– Bul sapar eki el arasyndaǵy dostyq qatynastyń damýyna tyń serpin beredi dep senemin. Shyn máninde, qazaq pen qyrǵyz – tilektes, baýyrlas elder. Bizdiń tarıhymyz – tamyrlas, salt-dástúrimiz ben tanym-túsinigimiz, ulttyq bolmysymyz uqsas. Qos halyqtyń tatýlyǵy men ózara qurmeti eshqashan úzilgen emes. Qazir de yqpaldastyǵymyz strategııalyq seriktestik rýhynda qarqyndy damýda. Biz barlyq deńgeıde ózara qurmetke negizdelgen saıası dıalog ornattyq. Memleketaralyq, parlamentaralyq jáne úkimetaralyq keńesterimiz tabysty jumys istep keledi. Sondaı-aq óńiraralyq baılanystardy damytyp jatyrmyz. Jalpy, eki eldiń arasynda jan-jaqty ári tyǵyz yntymaqtastyq ornaǵan, – dedi Qasym-Jomart Toqaev.
Memleket basshysy Qyrǵyzstan Prezıdentiniń ekijaqty yqpaldastyqty jańa deńgeıge kóterýge zor úles qosqanyna nazar aýdardy.
– Men muny joǵary baǵalaımyn. Qajyrly eńbegińizdiń arqasynda Qyrǵyzstanda kóptegen oń ózgeris bolyp jatyr. Siz halyqtyń ál-aýqatyn jaqsartýdy kózdeıtin mańyzdy bastamalardy júzege asyryp kelesiz. El ekonomıkasynyń jyl basynan beri 11,7 paıyzǵa ósýi – osynyń aıqyn dáleli. Biz baýyrlas eldiń barlyq jetistikterine qýanamyz. Qyrǵyzstanmen aradaǵy yntymaqtastyqty barynsha nyǵaıtýǵa aıryqsha mán beremiz, – dedi Memleket basshysy.
Sadyr Japarov shaqyrýyn qabyl alyp, Qyrǵyzstanǵa resmı saparmen kelgeni úshin Qazaqstan Prezıdentine rızashylyǵyn jetkizdi
– Sizdi Qyrǵyzstanda kórnekti memleket qaıratkeri jáne halyqaralyq deńgeıdegi tájirıbeli dıplomat retinde biledi. Sońǵy jyldary Sizdiń qoldaýyńyzben eki eldiń qarym-qatynasy jańa deńgeıge ótip, dostyǵymyz ben baýyrlastyǵymyzdyń bekemdele túsýi bizdi qýantady. Qazaq eli – biz úshin erekshe el. Bizdiń mámilelerimiz Toqtoǵul men Abaıdaı, Shyńǵys pen Muhtardaı atalarymyz salǵan izbenen jalǵasqan. Tarıhı muramyzdy umytpaı, keleshek býynǵa jetkizýdi negizgi maqsatymyz dep esepteımin. Óz tarapymnan ózara qarym-qatynasymyzdy odan ári ilgeriletýge daıynmyn. Bizdiń negizgi kúshimiz – eki eldiń yntymaǵy men birligi, – dedi Qyrǵyzstan Prezıdenti.
Budan bólek, kelissóz barysynda taraptar saıası, kólik-tranzıt, sý, agrarlyq jáne tsıfrlandyrý salalaryndaǵy yqpaldastyqty nyǵaıtý máselelerin talqylady.
Mádenı-gýmanıtarlyq baılanystardy óristetýge erekshe mán berildi. Sonymen qatar óńirlik jáne halyqaralyq kún tártibi qarastyryldy.
Aıta ketelik «Yntymaq Ordo» rezıdentsııasynda Qyrǵyz Respýblıkasyna resmı saparmen kelgen Prezıdent Qasym-Jomart Toqaevty saltanatty qarsy alý rásimi ótti.