Qasym-Jomart Toqaev pen Sadyr Japarov baspasóz brıfıngin ótkizdi

BІShKEK. KAZINFORM — Kelissózder qorytyndysy boıynsha Memleket basshysy Qasym-Jomart Toqaev pen Qyrǵyz Respýblıkasynyń Prezıdenti Sadyr Japarov BAQ ókilderi úshin málimdeme jasady. Bul týraly Aqordanyń baspasóz qyzmeti habarlady. 

Prezıdent, eń aldymen, Bishkekke resmı saparmen kelýge shaqyrǵany úshin Qyrǵyzstan Prezıdenti Sadyr Japarovqa alǵys aıtyp, baýyrlas qyrǵyz jerine qadam basqan saıyn aıyr qalpaqty aǵaıynnyń ystyq yqylasyn sezinetinin jetkizdi.

Memleket basshysy Qazaqstan men Qyrǵyzstannyń Joǵary memleketaralyq keńesiniń jetinshi otyrysy barysynda ekijaqty qatynastarǵa qatysty birqatar ózekti másele egjeı-tegjeı talqylanyp, eki eldiń de múddesine saı keletin mańyzdy kelisimderge qol jetkizilgenin málimdedi.

– Baýyrlas memleketter retinde kez kelgen máseleni ózara senim men odaqtastyq rýhynda sheshemiz degen paıymǵa keldik. Bizdiń ózara tıimdi yqpaldastyqty odan ári keńeıtýge nıetimiz bar. Oǵan saıası kúsh-jigerimiz de jetedi dep kámil senemin. Búgingi kelissózderdiń nátıjesi týraly jańa ǵana qurmetti Prezıdent aıtyp ótti. Biz, eń aldymen, saýda-ekonomıkalyq baılanystardy nyǵaıtýǵa aıryqsha nazar aýdaryp otyrmyz. Qazaqstan – Qyrǵyzstannyń saýda jáne ınvestıtsııa salasyndaǵy negizgi seriktesiniń biri. Byltyr ózara taýar aınalymy 1,7 mıllıard dollarǵa jetti. Bıylǵy jarty jyldyń kórsetkishteri de jaman emes. Aldaǵy 5 jylda saýda-sattyq kólemin 3 mıllıard dollarǵa deıin arttyrýǵa múddelimiz. Sondyqtan búgin arnaıy Jol kartasyna qol qoıyldy. Jalpy, ekijaqty saýda aınalymyn ulǵaıtýǵa mol múmkindik bar. Kelesi jyly qazaq-qyrǵyz shekarasynda salynyp jatqan Indýstrııalyq saýda-logıstıka kesheni iske qosylmaq, – dedi Qasym-Jomart Toqaev.

Prezıdenttiń pikirinshe, eki eldiń agroónerkásiptegi áleýeti zor.

– Bul saladaǵy taýar aınalymy jalpy saýda-sattyqtyń 25 paıyzyna teń. Sondyqtan ónim kólemin arttyrý, birlesken kásiporyndar ashý óte mańyzdy. Osy oraıda qos eldiń úkimetterine aldaǵy eki jylǵa arnalǵan Jol kartasyn qabyldaý týraly tapsyrma berildi, – dedi Memleket basshysy. 

Qasym-Jomart Toqaev qazaq ınvestorlary qyrǵyz ekonomıkasynyń mańyzdy sektorlaryn damytýǵa úles qosyp kele jatqanyna nazar aýdardy.

Qazaqstan sońǵy 20 jylda Qyrǵyzstan ekonomıkasyna 1,4 mıllıard dollar ınvestıtsııa salǵan. Onyń ishinde áleýmettik mańyzy zor jobalar bar.

– Biz birlesken kásiporyndardyń tıimdi jumys isteýi úshin qolaıly jaǵdaı jasaı beremiz dep kelistik. Sondaı-aq qazaq-qyrǵyz shekarasynyń ótkizý múmkindigin arttyrýǵa basa mán berdik. Júk tasymaly máselesine de erekshe nazar aýdardyq. Sońǵy kezde osy baǵytta birqatar aýqymdy is-shara atqaryldy. Qazir shekaradaǵy segiz ótkizý beketin jańǵyrtý jumysy júrgizilip jatyr. Bul jumys aldaǵy eki jylda tolyq aıaqtalady. Ony eki el úkimeti erekshe baqylaýda ustaıdy. Munyń bári ózara saýda kólemin arttyrýǵa septigin tıgizedi, – dedi Memleket basshysy.