Astanada Aıkól Manas eskertkishi saltanatty túrde ashyldy
ASTANA. KAZINFORM - Memleket basshysy sharada sóılegen sózinde elordada mundaı eńseli eskertkishtiń boı kóterýi, eń aldymen, qazaq halqynyń qyrǵyz aǵaıynǵa degen rııasyz qurmetiniń belgisi ekenin atap ótti. Bul týraly Aqordanyń baspasóz qyzmeti habarlady.
– Eki jyl buryn Bishkekte uly Abaıdyń eskertkishi ashylǵanyn bilesizder. Men sol sharaǵa arnaıy baryp qatystym. Mundaı ıgi bastamalar eki eldiń dostyq baılanysyn nyǵaıta túsetini sózsiz, – dedi Qazaqstan Prezıdenti.
Qasym-Jomart Toqaev myńjyldyq tarıhy bar Manas jyryn barsha adamzat rýhanııatynda ózindik orny bar biregeı mura retinde atap ótip, ony tek qyrǵyz halqynyń ǵana emes, tutas túrki jurtynyń baǵa jetpes qazynasy deýge bolatynyn aıtty. – Áıgili jyrdyń zaman synaǵynan aman ótip, búgingi kúnge jetýine qazaq ǵalymdary zor úles qosqan. Osy oraıda Shoqan Ýálıhanov, Muhtar Áýezov, Álkeı Marǵulan sııaqty birtýar tulǵalardy atap ótýge bolady, – dedi Qasym-Jomart Toqaev.
Qyrǵyzstan Prezıdenti Sadyr Japarov Manas jyry qyrǵyz halqynyń tarıhı jáne rýhanı murasyna aınalǵanyn atap ótip, urpaqtan urpaqqa jetkenine toqtaldy
– Dúnıejúzilik aýyz ádebıetiniń eń uly týyndysy bolǵan Manas eposyn zertteýde qazaq halqynyń birtýar tulǵalarynyń qosqan úlesi zor ekenin aıtý – tarıhı ádilettilik. Bul oraıda talantty zertteýshi Shoqan Ýálıhanov Manas eposyna qyzyǵyp, qaǵaz betine túsirip, ǵylymı aınalymǵa engizdi. Sondaı-aq uly jazýshy Muhtar Áýezovtiń Manas týraly alǵashqy monografııalyq eńbek jazǵany qazaq-qyrǵyz arasynda keńinen málim. Sondyqtan búgin Qyrǵyzstan men Qazaqstan qarym-qatynasyndaǵy tarıhı kún. Aıkól Manas eskertkishiniń qazaq jerinde ashylýy eki eldiń baýyrlastyǵyn taǵy bir márte dáleldedi, – dedi Qyrǵyzstan Prezıdenti.
Sadyr Japarov barsha qyrǵyz eliniń atynan Qasym-Jomart Toqaevqa jáne Aıkól Manas eskertkishin ashýǵa úles qosqan azamattarǵa rızashylyǵyn bildirdi.
Saltanatty sharaǵa Qyrǵyzstannyń resmı delegatsııa músheleri jáne eki eldiń zııaly qaýym ókilderi qatysty.
