Qasym-Jomart Toqaev pen Rejep Taııp Erdoǵan telefon arqyly sóılesti

ASTANA. KAZINFORM – Qazaqstan men Túrkııa prezıdentteri bir-birin Oraza aıt merekesimen quttyqtap, eki el halyqtaryna baq-bereke tiledi. Bul týraly Aqordanyń baspasóz qyzmeti habarlady. 

Memleketter basshylary qazaq-túrik strategııalyq seriktestigin odan ári damytýǵa qos tarap árdaıym daıyn ekenin jetkizdi.

Áńgimelesý barysynda saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqty ilgeriletýge yqpal etetin joǵary deńgeıdegi belsendi saıası dıalogty qoldaýdyń ózektiligi aıtyldy.

Budan bólek, prezıdentter kópjaqty formattaǵy tyǵyz yqpaldastyqty jalǵastyrýdyń mańyzdy ekenine toqtalyp, halyqaralyq uıymdar aıasyndaǵy aldaǵy kezdesýlerdiń kestesin talqylady.