Qasym-Jomart Toqaev pen Rejep Taııp Erdoǵan Qazaqstan-Túrkııa bıznes forýmyna qatysty
ASTANA. KAZINFORM — Memleket basshysy bul forýmnyń eki el úshin tıimdi ári mazmundy bolǵanyn atap ótip, alqaly jıyndy uıymdastyrýǵa atsalysqan Túrkııa tarapyna alǵys aıtty. Prezıdent Qazaqstanda túrik kompanııalaryna jan-jaqty qoldaý kórsetilip jatqanyna toqtaldy. Bul týraly Aqorda málim etti.
— Qazir elimizde túrik kapıtaly bar 3 800-ge jýyq kásiporyn tabysty qyzmet etip jatyr. Birlesken kúsh-jigerimizdiń arqasynda myńdaǵan jumys orny ashyldy. Investıtsııalyq kórsetkishti arttyrý úshin ónerkásip salasyndaǵy yntymaqtastyqty tereńdetý mańyzdy. Búgingi is-shara birlesken kásiporyndar sanyn odan ári kóbeıtýge múmkindik beredi dep senemin. Bul rette Qazaqstan-Túrkııa úkimetaralyq komıssııasy aıryqsha ról atqarýǵa tıis dep sanaımyn, — dedi Qasym-Jomart Toqaev.
Memleket basshysy elimizdiń áleýmettik-ekonomıkalyq damý kórsetkishterin tilge tıek etti.
— Qazaqstan — Ortalyq Azııadaǵy ekonomıkasy eń iri memleket. Byltyr elimizdegi ishki jalpy ónim kólemi 6,5 paıyzǵa ósip, 300 mıllıard dollardan asty. Bul ishki naryqtyń turaqtylyǵy men zor áleýetin kórsetedi. Biz osy úrdisti kúsheıte túsýge nıettimiz. Búginde Qazaqstan bilimdi, ǵylymdy jáne ınnovatsııany damytýǵa basa mán berip otyr. Bul — elimizdiń aldynda turǵan strategııalyq mindet. Ózderińizge málim, naýryz aıynda elimizde jalpyhalyqtyq referendým ótti. Jańa Konstıtýtsııaǵa sáıkes Qazaqstanda menshiktiń barlyq túrine kepildik beriledi. Elimizdiń bas qujaty ınvestorlardyń quqyǵyn barynsha qorǵaıdy. Alaıda sheteldik jáne otandyq kásipkerlerdiń zańdarymyzdy buzýǵa quqy joq. Konstıtýtsııaǵa engizilgen «Zań men tártip» qaǵıdaty boıynsha ár azamat zań aldynda birdeı jaýap beredi, — dedi Prezıdent.
Eske sala keteıik, buǵan deıin Toqaev pen Erdoǵan strategııalyq seriktestik týraly deklaratsııaǵa qol qoıdy.
