Qasym-Jomart Toqaev pen Rejep Taııp Erdoǵan BAQ ókilderi úshin brıfıng ótkizdi

ANKARA. KAZINFORM – Memleket basshysy, eń aldymen, Túrkııaǵa resmı saparmen kelýge shaqyryp, qazaq delegatsııasyna qonaqjaılyq kórsetkeni úshin baýyrlas túrik halqyna jáne Prezıdent Rejep Taııp Erdoǵanǵa shynaıy rızashylyǵyn bildirdi.

– Qos halyqtyń ıgiligi úshin túbi bir túrik eline jasaǵan ár sapardyń mán-mańyzy erekshe. Prezıdent Rejep Taııp Erdoǵannyń basshylyǵymen Túrkııa óziniń altyn ǵasyrlyq belesin tarıhı jetistiktermen qarsy alyp jatyr. Elińiz jańa dáýirge nyq qadam basty. Qurmetti Prezıdenttiń halyqaralyq sahnadaǵy salıqaly saıasatynyń arqasynda Túrkııa álemdegi bedeldi ári yqpaldy, shynaıy qurmetke ıe memleketke aınaldy. Munyń túp negizinde túrik halqynyń birligi, danalyǵy jáne qaısarlyǵy jatyr. Osyndaı bıik belesterdi baǵyndyrý – Prezıdent Rejep Taııp Erdoǵan myrzanyń qajyrly eńbeginiń jemisi dep kúmánsiz aıtýǵa bolady. Qazaq azamattary Prezıdent Rejep Taııp Erdoǵandy jáne búkil Túrkııa elin shyn júrekten qurmetteıdi. Qazaqstan Túrkııanyń tolaıym tabysyna árdaıym qýanady. Bolashaǵynyń jarqyn bolýyn tileıdi, - dedi Qasym-Jomart Toqaev. 

Prezıdent qazir eki eldiń qarym-qatynasy keńeıtilgen strategııalyq seriktestikke ulasqanyna nazar aýdaryp, búgingi nátıjeli kelissózder qos halyq arasyndaǵy baılanysty jańa deńgeıge kóteretinine senim bildirdi. 

– Biz búgin Joǵary deńgeıdegi strategııalyq yntymaqtastyq keńesiniń 5-shi otyrysyn ótkizdik. Ózara yqpaldastyqqa tyń serpin beretin basym baǵyttardy qarastyrdyq. Túrli saladaǵy baılanysty jandandyratyn mańyzdy úkimetaralyq qujattarǵa qol qoıdyq. Túrkııa – saýda-ekonomıka jáne ınvestıtsııa salasyndaǵy basty strategııalyq seriktesimizdiń biri. Osy oraıda ózara taýar aınalymyn ulǵaıtý máselesine basa nazar aýdardyq. Byltyr eki el arasyndaǵy saýda-sattyq kólemi 5 mıllıard dollar boldy. Aldaǵy ýaqytta saýda aınalymyn aıtarlyqtaı arttyramyz. Buǵan áleýetimiz jetedi, – dedi Memleket basshysy.

Eske sala keteıik, buǵan deıin Qazaqstan Respýblıkasy men Túrkııa Respýblıkasy arasynda Birlesken deklaratsııa qabyldanǵanyn habarlaǵan edik.