Qasym-Jomart Toqaev pen Reseı Prezıdenti Vladımır Pýtın kezdesti
ASTANA. KAZINFORM – ShYU mereıtoılyq sammıti aıasynda Prezıdent Qasym-Jomart Toqaev pen Reseı Federatsııasynyń Prezıdenti Vladımır Pýtınniń kezdesýi ótti. Bul týraly Aqorda habarlady.
Taraptar Qazaqstan men Reseı arasyndaǵy dostyq, tatý kórshilik jáne odaqtastyq rýhynda damyp kele jatqan san qyrly yntymaqtastyq qarqyndy sıpat alǵanyna nazar aýdardy.
Vladımır Pýtın Memleket basshysyn Quryltaı saılaýynyń tabysty ótýimen quttyqtady. Onyń aıtýynsha, daýys berý nátıjesi Qasym-Jomart Toqaevtyń Qazaqstandy odan ári damytýǵa, ishki saıası turaqtylyqty nyǵaıtýǵa, ekonomıkany ilgeriletýge jáne halyqtyń turmys sapasyn arttyrýǵa baılanysty kóptegen máseleni sheshýge baǵyttalǵan strategııalyq baǵdary keńinen qoldaý tapqanyn rastaıdy.
Qazaqstan Prezıdenti quttyqtaýy úshin Reseı basshysyna rızashylyǵyn bildirip, konstıtýtsııalyq reforma aıasynda júrgizilip jatqan jumystar jóninde áńgimeledi
– Qazaqstandy jańǵyrtý úderisi ulttyq múddemizge saı jalǵasa beredi. Aty bar, zaty joq reformalar júrgizýge múldem bolmaıdy. Biz muny jaqsy túsinemiz. Eń aldymen, halqymyzdyń keleshegin oılaýymyz qajet. Ekijaqty yntymaqtastyqqa keler bolsaq, Sizdiń mamyr aıynda Astanaǵa jasaǵan memlekettik saparyńyz tabysty ótti. Ári sıpaty jaǵynan tarıhı sapar boldy dep sanaımyn. Qazir Úkimet qol qoıylǵan barlyq kelisimdi iske asyrýǵa kiristi. Ózińiz atap ótkendeı, saýda-sattyq tez damyp keledi. Ótken jylmen salystyrǵanda ósim baıqalady. Reseı bizdiń basty ınvestıtsııalyq jáne saýda seriktesimiz bolyp qala beredi dep oılaımyn. Bul úderisti barynsha qoldaımyn, – dedi Qasym-Jomart Toqaev.
Vladımır Pýtın ekijaqty qarym-qatynas barlyq baǵytta qarqyndy ilgerilep kele jatqanyn joǵary baǵalady.
– Byltyr elderimiz arasyndaǵy taýar aınalymynyń kórsetkishteri oıdaǵydaı boldy. Bıyl da ósim baıqalady. Kóptegen másele boıynsha birge jumys istep kelemiz. Kún tártibinde iri jobalar da, aǵymdaǵy máseleler de bar. Úkimetaralyq komıssııa belsendi jumys isteýde. Ózara ýaǵdalastyqtardy buljytpaı oryndaǵany úshin olarǵa alǵys aıtýymyz kerek. Ásirese, gýmanıtarlyq saladaǵy baılanystarymyzdyń jandana túskeni qýantady. Qazaqstandyq 60 myń stýdent Reseı joǵary oqý oryndarynda bilim alyp júr. Jýyrda ǵana Omby qalasynda Qazaqstannyń mańdaıaldy oqý ornynyń fılıaly ashyldy. ıAǵnı barlyq másele boıynsha ózara túsinistik ornaǵan. Búgin osy taqyrypty egjeı-tegjeıli talqylaýǵa múmkindik týyp otyr, – dedi Reseı Prezıdenti.
Memleketter basshylary saýda-ekonomıkalyq, ınvestıtsııalyq yntymaqtastyqty nyǵaıtý perspektıvasyn, sondaı-aq ózara múddege saı keletin salalarda birlesken jobalardy iske asyrý máselesin talqylady. Halyqaralyq jáne óńirlik kún tártibindegi ózekti máseleler jóninde pikir almasty.
Qasym-Jomart Toqaev Dúnıejúzilik kóshpendiler oıyndarynyń ashylý saltanatyna qatysqanyn jazǵan edik.
