Qasym-Jomart Toqaev pen Oman Sultany shaǵyn quramda kelissóz júrgizdi
ASTANA. KAZINFORM – Prezıdent Qasym-Jomart Toqaev pen Oman Sultany Haısam ben Tarıq Ál Saıd shaǵyn quramda kelissóz júrgizdi. Bul týraly Aqorda habarlady.
Prezıdent mártebeli meımanǵa iltıpat bildirip, Oman Sultanynyń Qazaqstanǵa jasaǵan birinshi saparynyń mańyzdy oqıǵa ekenin atap ótti.
– Asa mártebeli Sultan, elimizge alǵash ret memlekettik saparmen kelgen Sizdi qarsy alý – men úshin úlken mártebe. Munyń tarıhı máni erekshe ekenine senimdimin. Óıtkeni bul elderimiz arasyndaǵy san qyrly yntymaqtastyqty jandandyryp, jańa deńgeıge kóterýge jol ashady. Buǵan deıin atap ótkendeı, ózara yqpaldastyqtyń áleýeti mol. Muny tolyǵymen iske asyrý qajet, – dedi Qasym-Jomart Toqaev.
Memleket basshysy elderimiz senimdi serikteske aınalýy úshin barynsha kúsh salatynyn aıtty.
– Qazaqstandyqtar elińizge erekshe qurmetpen qaraıdy. Omanǵa saıahattap barǵan azamattarymyzdyń qatary qalyń. Alaıda Maskatty, Omannyń basqa da qalalaryn kórmegen otandastarymyz bar. Elderimiz arasynda qosymsha tikeleı kommertsııalyq áýe reısteri ashylsa, barys-kelis áldeqaıda jandana túseri sózsiz. Sizdiń saparyńyz aıasynda Dońǵa munaı ken ornyna qatysty mańyzdy kelisimge qol qoıylǵanynan habardarmyn. Bul da qos taraptyń ózara qarym-qatynasty ilgeriletýge múddeli ári daıyn ekenin kórsetedi. Muny ortaq jetistigimiz dep sanaımyn, – dedi Qasym-Jomart Toqaev.
Qasym-Jomart Toqaev Táýelsizdik saraıynda Oman Sultanyn qarsy alǵanyn jazǵan edik.
