Qasym-Jomart Toqaev pen Natasha Pırts-Mýsar shaǵyn quramda kelissóz júrgizdi
ASTANA. KAZINFORM - «Aqorda» rezıdentsııasynda Qazaqstanǵa resmı saparmen kelgen Slovenııa Prezıdenti Natasha Pırts-Mýsardy saltanatty qarsy alý rásimi ótti, dep habarlaıdy Aqordanyń baspasóz qyzmet.
Prezıdentter bir-birine delegatsııa múshelerin tanystyrdy. Budan keıin Qurmet qaraýylynyń bastyǵy raport berip, Qazaqstan men Slovenııanyń memlekettik ánurandary shyrqaldy.
Saltanatty rásimnen keıin memleketter basshylary kelissóz zalyna bardy.
Qasym-Jomart Toqaev mártebeli meımanǵa iltıpat bildirip, onyń sapary Qazaqstan-Slovenııa seriktestigin tereńdetýge septigin tıgizip, keń múmkindikterge jol ashatynyn aıtty.
– Slovenııamen tyǵyz yntymaqtastyq qurýǵa nıettimiz. Bul – anyq. Prezıdent retinde ózara múddemizge saı keletin barlyq saladaǵy baılanysty nyǵaıtýǵa kúsh-jigerimdi salamyn. Biz Slovenııany Qazaqstannyń Balqan túbegindegi negizgi jáne óte mańyzdy seriktesteriniń biri retinde qarastyramyz. Sizdiń eldiń bıznes ókilderine jáne úkimetińizge birqatar utymdy joba usyna alamyz, – dedi Memleket basshysy.
Prezıdenttiń aıtýynsha, Slovenııanyń Qazaqstan ekonomıkasyna salǵan tikeleı ınvestıtsııasynyń kólemi 200 mıllıon dollarǵa jýyqtady. Elimizdegi farmatsevtıka, mashına jasaý, telekommýnıkatsııa jáne jańartylatyn energııa kózderi salalarynda Slovenııa kapıtalynyń úlesi bar 19 kompanııa kásibin tabysty júrgizip keledi. Budan bólek, Qazaqstan men Slovenııanyń kólik-logıstıka, tsıfrlandyrý jáne ınnovatsııa, densaýlyq saqtaý, týrızm baǵyttarynda ózara seriktestikti arttyrýǵa áleýeti zor.
Slovenııa Prezıdenti ózine jáne delegatsııasyna qonaqjaılyq tanytqany úshin Qasym-Jomart Toqaevqa shynaıy rızashylyǵyn jetkizdi.
– Dıplomatııalyq qarym-qatynas ornaǵan 33 jyl ishinde eki el arasynda birde bir sheshilmegen másele bolǵan emes. Munyń ekonomıkalyq yntymaqtastyqty keńeıtýge, órkendetýge mol múmkindik beretinin durys atap óttińiz. Sondyqtan ózimmen birge bıznes ókilderiniń úlken delegatsııasyn alyp keldim. Olar qazaqstandyq áriptestermen birge seriktestikti ilgeriletýge qatysty baǵyttardy talqylap jatyr. Ekonomıkalyq yqpaldastyǵymyz artyp keledi. Degenmen budan da zor jetistikterge jetemiz dep oılaımyn. Prezıdentter men saıasatkerler arasyndaǵy baılanystar árqashan bolashaqqa baǵdarlanady. Óıtkeni saıasatkerler bıznestiń kókjıegin keńeıtedi, – dedi Natasha Pırts-Mýsar.
Sondaı-aq kelissóz barysynda taraptar jahandyq jáne óńirlik kún tártibindegi ózekti máseleler boıynsha jan-jaqty pikir almasty.
Osyǵan deıin Qasym-Jomart Toqaevtyń Aqordada Natasha Pırts-Mýsardy qarsy alǵanyn jazdyq.
